Laguna (Filipinas) – Iha 5 de Outubru de 2018, Mornese Center of Spirituality, Laguna, Philippines, hala’o enkontru Familia Salesiana husi Ciao ho tema “Dream, Resource, Challenge” .

Enkontru hahu ho selebrasaun Eukaristia selebra husi don Bonetti, SDB hafoin kontinua abertura ho orasaun anima  husi provincia Filipina.

Partisipanteantes Familia Salesiana husi Nasaun sira ne’ebe’ hola parte ba CIAO: Japaun, Thailandia, Korea, China, Hongkong, Myamar, Cambodia. Grupo sira: FMA, SDB, Salesiano Cooperadores, ADMA, Antigas/antigus alunus FMA. Partisipante hamutuk 69 pesoas .

Loron dahuluk hahu ho tematiku Familia salesiana nia Mehi, forza no disafiu sira. Loke ho komprimentus no mensajem husi Retor Mor no Madre Jeral madre Yvonne Reungoat ba partisipante sira liuhusi Video ida. Sr. Maria Luisa Miranda, konsiliera jeral ba ambito Familia salesiana hamutuk ho kolaboradora husi ambito sr. Gabriela Patiño no sr. Leslye Sandigo, hamutuk sira anima enkontru ne’e.

Sr. Maria Luisa Miranda, konselleira jeral ba ambito Familia salesiana aprezente enkontru nia finalidade mak “Mehi hanesan ita nia fundador no fundadora “Misaun kondivida ho foinsa’e sira no ba foinsa’e sira”. Objetivu: deskobre hikas valores husi Familia salesiana hanesan espresaun husi Karizma salesiano no dalan ba futuru.

Konteudu loron dahuluk ne’e riku ho reflesaun ba membru familia Salesiana CIAO, sai nudar konvite ida atu hateke ba futuru atu la’o hamutuk nudar familia ida iha dalan santidade, tuir espiritualidade Don Bosco no Madre Mazzarello nian, ne’ebe’ diferente liu ho kongregasaun sira seluk. Kada membru familia salesiana, ita ida-ida mak parte kiik ida, hanesan iha S. Paolo nia karta ba Korintu:” … iha Isin ida deit, maibe iha parte oioin. Nune’e nudar familia salesiana ita fahe karizma ida hanesan, maske kada grupu ita iha “mata dalan/regulamentu rasik, maibe ita nia knaar mak tulun foinsa’e sira hetan sira nia fatin iha familia salesiana nia laran. Hanesan don Bosco rasik dehan:’ tulun foinsa’e atu sai “Amici di Dio”.

Reflesaun Loron dahuluk nian,  husik iha partisipante ida-ida impresaun furak, katak agradese Maromak tan bolu don Bosco no Madre Mazzarello nudar fundar/a santu ba foinsa’e sira hotu, ne’e mak ksolok ba membru familia salesiana tomak. Nune’e tempu mai ita, atu tau koor ne’ebe’ furak liutan buat ne’ebe’ ita nia fundaor/a sira hahu ona.

Loron dahurak, 6 Outubru 2018, Familia salesiana CIAO reflete hamutuk kona ba forza sira, ne’ebe’ iha nudar familia boot don Bosco no Madre Mazzarello nian. Nune’e husu husi kada grupo atu bele fo liman ba malu iha kolaborasaun ba misaun salesiana ba foinsa’e sira no ho foinsa’e sira.

Familia salesiana iha forza barak. Forza sira mak grupu ida-ida: Salesiano Cooperadores, ADMA, Antigas/antigus alunus, FMA no SDB. Ita iha forza barak, presiza deit atu tau hamutuk ba misaun ida deit ho Karizma ida deit Don Bosco no Madre Mazzarello.

Loron datoluk, reflete hamutuk kona ba disafiu no obstakolu sira ne’ebe’ Familia salesiana hasoru. Obstakulu mak: hanesan idade; laiha prezensa SDB no FMS sira; falta koñesimentu klean kona ba grupu sira nia papel iha familia salesiana nia laran; senti importante liu iha grupu seluk nia klaran; hases-an atu servizu hamutuk ho maluk konsagradu no leigus sira.

Remata ho avaliasaun no kalan kultural.

(Sebastiana Costa)