Liturjia Domingu da-28 konvida ita atu reflete kona-ba hilin sira ne’ebé ita halo; fó hanoin mai ita katak la’ós buat hotu ne’ebé nabilan mak osan-mean no katak presiza, dala ruma, hakribi valór ruma ne’ebé mohu lalais, atu bele manán valór sira moris loos no rohan-laek nian.

Iha leitura dahuluk, matenek-na’in ida Israel nian aprezenta mai ita “knananuk ida ba sabedouria”. Testu konvida ita atu manán “sabedouria” loos (don ida husi Maromak) no husik valór efémeru sira ne’ebé la realiza ema nu’udar ema. “Matenke-na’in” loos mak ida-ne’ebé hili atu rona Maromak nia proposta sira, aseita dezafiu sira, la’o tuir  dalan ne’ebé Nia hatudu.

Evanjellu aprezenta mai ita mane ida ne’ebé hakarak alkansa vida eterna. Jezús konvida nia atu husik ninia rikusoin sira no hili “dalan Reinu nian” – dalan partilla nian, solidariedade nian, doasaun nian, domin nian. Iha dalan ida-ne’e – Jezús garante ba ninia dixípulu sira – mak ema bele realiza tomak nia an no hetan moris rohan-laek.

Leitura daruak konvida ita atu rona no simu Maromak nia Liafuan ne’ebé Jezús fó nu’udar proposta. Liafuan moris, efikás, atuante. Bainhira simu/akolle iha fuan, Liafuan ne’e nakfilak ema, hafoun nia, tulun atu dixerne kona-ba di’ak no aat no halo opsaun korreta, hodi hatudu ba nia dalan loos atu to’o ba moris nakonu no definitiva.

Download