Venilale –  “Escola Técnico-vocacional Hotelaria e Turismo” S. Maria Mazzarello hetan surpreza furak hodi simu embaixadora Estados Unidos de América, Sra Kathleen Fitzpatrick, iha loron 4 Outubru 2018. Nia dehan katak ninia programa mak vizita distritu sira no eskola sekundária sira. Distritu Baucau mak uluk liu no nia mai uluk Venilale no eskola dahuluk atu vizita mak ETV Madre Mazzarello. Nia gosta Venilale tanba iha paizajen furak, fatin furak “ho potensiál turizmu, ho potensiál ekonómiku importante”.

Estudante sira simu hodi fó bemvinda tradisionál ho tais no tebe-tebe. Hafoin Sra Kathleen agradese tebes ba akollida ne’ebé fó ho fuan manas hodi dehan katak nia mai surpreza tanba loloos nia vizita eskola sekundária, maibé tanba rona iha Escola Hotelaria e Turismo nia hakarak mai haree mós, tanba edukasaun ba feto no mane iha área ospitalidade no turizmu importante liu. Nia dehan katak iha Embaixada Amérika iha programa ba joven sira: “iha scolarship programs, ami iha programa ba lian inglés, ami iha programa kona-ba kreximentu lideransa”. Nune’e, nia konvida estudante sira atu asesu ba facebook embaixada EUA iha Timor-Leste atu hatene informasaun sira.

Maski Sra Embaixadora Kathleen hahú serbisu iha Timor-Leste iha fulan Janeiru 2018, maibé nia ko’alia tetun moos ona.