Dili – Ohin, 29-Setembru-2018, iha Escola Maria Auxilidora – Comoro Dili, selebra festa agradesementu eskola nian, molok atu selebra festa ida ne’e, semana rua antes hahu ona hala’o atividades balun, mak hanesan; reza ba alunos no professores sira turma ida-idak hahu husi Pre-Escolar to’o IX ano, ba professores da disciplina sira, trabalhadores, Komunidade Edukativa, Padre Kapelaun no Madre sira, aleinde reza iha mos atividade seluk hanesan;  konkurso biblia, kompetisaun dezeñu, dansa tradisional, kompetisaun ba Coro no kompetisaun  lee biblia.

Iha loron 27 iha konfisaun ba estudante  sira ne’ebé simu ona primeira komuñaun. hafoin ohin dader tuku 08.30. otl iha selebrasaun Eukaristia, ne’ebé selebra husi Padre provinsial Salesiano Pe. Apolinario Neto, SDB. Iha selebrasaun ida ne’e alunos sira haksolok tebes no atenta liu ho Padre nia omilia ne’ebé fahe kona ba arkanju nain tolu. Uluknanain Padre konvida estudante hotu atu agradese aman Maromak ba grasa ne’ebé hetan durante tinan ida, tempu hanesan padre fahe mos kona ba anju nain tolu Miguel, Gabriel no Rafael sira ida-idak nia knar, hatutan tan katak Maromak Kria anju barak tuir Nia hakarak no hanoin, atu nune’e anju sira ne’e bele sai ita nia mahein. Ikus nian padre hato’o mensajen ba estudante  sira katak “ imi ida-idak  tenke lori mensajen ksolok husi anju nain tolu ba imi nia maluk sira, padre husu ba estudante sira atu labele lakon tempu, labele husik tempu ne’ebé oferese husi atividade no meius oioin ne’ebé madre no profesorres fo aproveita didiak no simu buat hotu  ho ksolok hodi agradese ba Maromak ba Madre, professores, aman inan, sira fo tomak sira nia tempu atu eduka imi sai sidadaun diak no sarani ne’ebé onestu”.

Depois selebrasaun Eukaristia kontinua kedas ho konvivio no fahe premio ba manan nain sira, molok konvivio Madre Diretora, madre Sebastiana mos hato’o nia  mensajen badak hodi agradese ba  Padre Provinsial, estudante, professores no Komunidade Edukativa sira ne’ebé marka prezensa iha programa ida ne’e. Hafoin  estudante sira ne’ebé iha talentu ba kanta no sira ne’ebé lian diak komesa espresa sira nia lian furak hodi anima estudante  no ema hotu ne’ebé iha, programa ne’e remata iha lorokraik tuku 03.00 otl.

(Maria Sarmento Guterres)