Venilale – Irmán perpétua sira komunidade Madre Mazzarello, Venilale, iha loron 25 no 26 Setembru, hakle’an no reflete kona-ba  “identikit ema orasaun nian” hodi kompara ho Don Bosco no Madre Mazzarello. Iha karakterístika lima ne’ebé hetan iha Don Bosco no Madre Mazzarello: ema sira ne’ebé “bulak ba Kristu”, maibé mós ho atensaun maka’as ba ema nia difikuldade eh problema sira; ema sira unifikada, tan ne’e sira hakmatek nafatin; ema sira ne’ebé hatudu, iha sira-nia moris, mistériu paskál Jezús nian; ema haraik-an, no kiak iha laran; ema sira ne’ebé komunika valór sira.

Depoizde haree identikit ne’e, Irmán sira reflete mesak no loron tuirmai fahe kona-ba pergunta tolu hanesan tuirmai ne’e: Entre karakterístika sira ne’e, ida ne’ebé mak susar liu mai ha’u atu moris tuir? Tanba sá? Kondisaun sa de’it favorese katak ha’u no irmán sira iha komunidade bele hatudu karakterístika sira ne’e? Iha proposta konkreta ruma atu hato’o ba komunidade atu ita bele moris nu’udar ita-nia Fundadór sira nia oan loos no hatudu sira-nia espíritu ohin loron?

Husi sharing, Irmán sira dehan katak seidauk moris loloos tuir Don Bosco no Madre Mazzarello. Tuir ida-idak nia esperiénsia balun hanoin katak nia presiza haka’as an liután atu sai “ema ne’ebé komunika valór sira” ho sasin moris, sai inan no edukadora ba joven sira “zaman now”, konjuga delikadeza ho firmeza, buka halakan esperansa iha joven sira. Irmán ida dehan katak komunika valór liu mós husi prepara orasaun didi’ak iha momentu reza hamutuk ho joven sira. Aleinde ne’e, Irmán na’in rua subliña nesesidade atu sai liután ema unifikada, hakmatek, besik nafatin ba Jezús. Kondisaun sira atu atu halo ida-ne’e mak kria silénsiu, relasaun di’ak entre Irmán sira hodi iha unidade intervensaun nian, respeita ema no empatia, komprensaun. Iha Eukaristia mak loloos ita sai ida de’it ho Jezús no aprend ehusi nia atu saran an tomak, atu horik nafatin iha Ninia prezensa. Ita presiza ba fali abut, lee ita-nia dokumentu sira, ita-nia Fundadór/a ninia moris atu bele “atualiza” ohin loron karizma ne’ebé sira hatutan mai ita.

Se ita moris tuir ita-nia Fundadór no Fundadora no buat ne’ebé Konstituisaun husu, ita sei halo ita-nia uma sira sai uma Maromak nia domin nian.