Cassa (Ainaro) – Misaun iha Kassa ba fulan Setembru nian hala’o durante loron rua, 22 no 23. Aproveita ho fulan biblia nian, hala’o enkontru ho professor sira Eskola Pre-secundária Cassa, kompetisaun biblia ba estudante 3^o ciclo, jogos, animasaun, selebrasaun no taka ho fahe merenda ba hotu ne’ebé partisipa iha atividade ne’e. Professores sira  husu atu irman Sebastiana, fahe ho sira reflesaun ruma kona ba biblia. Nune’e iha loron sábadu molok hala’o kompetisaun biblia, hala’o uluk formasaun badak kona ba biblia. Iha enkontru ne’e irman Sebastiana aprezenta introdusaun baze kona ba  biblia, parte segundu sira nia perguntas kona ba  papel edukadores iha alunos no oan sira nia moris, nune’e irman foti evanjellu loron nian kona ba fini oioin ne’ebé agrikultor sira kari iha rai no monu iha rai ne’ebé diak, sei lori fuan wain. Hatutan tan katak moris mak prezente boot husi Maromak, moris mak fini ida. Terenu /rai ne’ebé diak mak familia, agrikultor ne’ebé tulun fini atu buras mak edukador/a ida. Nune’e atu eduka, edukador ida  presiza pasiensia atu halo sai posibel dezenvolvimentu integral husi ema ida-idak ho ninia potensialidade rasik. No ajuda oan ida-idak atu sai ninia-an rasik, halo ema ne’e sai “Rai” ida ne’e ninia sidadaun, nune’e atejamentu pozitivu ne’ebé nu’udar inan, aman no edukador presiza iha mak; hadomi oan sira, katak hatene simu sira nu’udar sira rasik, domin laran diak; mak sintezi iha relasaun edukativu ne’ebé loos no diak. Ikus nian madre foti Don Bosco nia sistema edukativa hodi dehan; “ Be matan iha edukasaun mak karidade Evanjelika ne’ebé favorese, amizade, konfiansa, kria klima familia nian , Iha ne’ebé valores sira sai klaru no komprieensivu no ezijensia sira ne’ebé oan ida ka alunos ida bele simu”. Ita tenke laran metin iha edukasaun tanba liu husi edukasaun ita koñese labarik sira nia situasaun nune’e ita hadomi sira, halo ita nia hilin sira edukativu nian atu salva ita nia alunos sira hodi transforma ita nia sosiedade.

Ho tempu hanesan estudante sira husi 3 ^o Ciclo, hala’o limpeza hodi hamoos igreja, hafoin hala’o kompetisaun biblia, estudante sira ne’ebé partisipa  iha kompetisaun ne’e  iha grupo walu mai husi alunos setimo ano too nono ano. Alunos, professores sira kontente tebes ho atividade ida ne’e, maske sira hela iha area rural maibe sira iha tebes hakarak atu koñese Jesus liu husi sertame, hodi  hakas-an atu estuda no dekor resposta sira atu bele sai manan nain iha kompetisaun.

Konkluzaun ba atividades ida ne’e mak iha lorokraik hala’o selebrasaun biblia hamutuk iha igreja Cassa, nu’udar ita nia tradisaun fahe buat ruma midar ba hotu. Labarik, professores no inan aman sira ne’ebé partisipa iha atividade ne’e, sira kontente no agradese tebes ba madre sira nia prezensa atu hala’o  festa biblia hamutuk, sira dezeju mak “ Ami hein atu  Madre Sira hela hamutuk ho ami iha Cassa”.

(Maria Sarmento Guterres)