Liturjia Domingu da-26 Tempu Komún aprezenta sujestaun oioin atu fiar-na’in sira bele purifika sira-nia opsaun no integra, ho forma nakonu no totál, komunidade Reinu nian. Sujestaun ida importante liu (ne’ebé leitura dahuluk aprezenta no Evanjellu rekupera) maka fiar-na’in sira lalika pretende katak sira mak iha ho modu eskluzivu lialoos no dadi’ak, maibé iha kapasidade atu rekoñese no aseita Maromak nia Espíritu nia prezensa no hahalok liuhusi ema di’ak barak ne’ebé la pertense ba instituisaun Kreda, maibé sai sinál Maromak nia domin iha mundu nia leet.

Leitura dahuluk, hodi aprezenta Povu nia marxa iha rai-fuik maran, hanorin katak Maromak nia Espíritu huu iha-ne’ebé nia hakarak no ba sé nia hakarak, no la iha regra, interese pesoál ka priviléjiu grupu ruma ne’ebé sai limite ba Nia. Fiar-na’in ne’ebé loos mak ida be hanesan Moisés, rekoñese Maromak nia prezensa iha jestu profétiku sira ne’ebé nia haree iha nia sorisorin.

Iha Evanjellu, ita iha instrusaun ida ne’ebé Jezús fó atu tulun eskolante sira tama iha lójika Reinu nian. Nia konvida sira atu sai komunidade ida, lahó arrogánsia, lahó laran-moras, lahó prezunsaun posesu lialoos no dadi’ak nian, buka hakohak, apoia no estimula sira hotu ne’ebé atua ba maun-alin sira-nia libertasaun; konvida sira atu keta esklui husi dinámika komunitária sira-ne’ebé ki’ik no kiak, konvida sira mós atu fokit sai husi sira nia vida sentimentu no atitude hotu inkompativel ho opsaun ba Reinu.

Leitura daruak konvida fiar-na’in sira atu keta tau sira-nia konfiansa no esperansa iha soin materiál, basá sira sei mohu no asegura moris nakonu ba ema. Ida tan: injustisa sira ne’ebé ema  sira akumula soin materiál nu’udar finalidade ezisténsia nian halo, sei hadook sira husi komunidade eleitu Maromak nian.

Download