Proposta laboratóriu ba katekeze

 

Dili – Semináriu katekétiku ba irmán juniora, tuir programa fahe ba módulu tolu. Módulu dahuluk hala’o husi loron 1 to’o 4 Abríl 2013, iha komunidade Madre Morano Fuiloro-Lospalos. Módulu daruak hala’o husi loron 1 to’o loron 5 Dezembru 2013 iha Dili. Módulu datoluk sei hala’o tinan oin. Enkarregada ba semináriu ne’e mak irmán Lucia Pereira.

 

Konteúdu módulu daruak mak Katekeze bíbliku ho métodu ermeneútiku;katekeze narrativa; katekeze iha métodu edukativu  Don Bosco no Madre Mazzarello nian; relasaun entre katekeze no liturjia; ekleziolojia; sakramentolojia husi pontudevista katekístiku; katekeze liuhusi media komunikasaun; valór relijiozu ka fiar tradisionál Timor-Leste nian iha konfrontu ho tradisaun bíbliku.

Irmán sira ne’ebé tuir semináriu ne’e hamutuk na’in 20 maski na’in tolu la’ós juniora, maibé tanba sir ahahú tiha ona kursu ne’e molok halo profisaun perpétua, entaun sira kontinua sira-nia formasaun katekétika ne’e.

Entre palestrante sira no fasilitadora sira iha irmán Alma Castagna, irmán Alexandrina Pinto, irmán Lucia Pereira, señor Marçal no irmán Jacinta Gusmão.

Parte loraik loron ikus nian, 5 Dezembru, irmán sira hala’’o laboratóriu katekeze nian nu’udar proposta atu hatán ba Kreda nia konvite atu foti ho seriedade knaar Evanjelizasaun Foun nian, “foun iha ninia laran-manas, iha ninia métodu sira, iha ninia espresaun sira” (João Paulo II ba Amérika Latina).

Tanba sá hili metodolojia laboratóriu nian?

• Tanba nune’e ita bele to’o ba foin-sa’e sira-nia mundu no uza sira-nia linguajen
• Tanba bele estimula no personaliza asimilasuan konteúdu nian nune’e mós kriatividade
• Envolve intelijénsia, emosaun no isin
• Serbisu ho media mak serbisu tipu kooperativu
• Meta katekeze nian ne’ebé konsege to’o sai vizivel no partilla ih akomunidade
• Asume modalidade típika linguajen media nian
• Fasilita kooperasaun entre adultu sira rasik
• Introdús iha katekeze didátika no pedagojia moderna

Proposta laboratóriu katekeze nian konsiste iha aula ida ho instrumentu multimedia ruma hanesan televizaun, computer, livru, DVD, nst iha tentativu atu tau hamutuk katekeze ho komunikasaun.  Ohin loron media sira mak ita-nia ambiente kulturál. Hanesan Amu-Papa Bento hakerek, “ambiente dijitál la’ós de’it mundu paralelu ida virtuál loos de’it maibe parte realidade moris lorloron ema barak nian, liuliu sira ne’ebe foin-sa’e liu” … nune’e bele sai “instrumentu evanjelizasaun nian” (Mensajen ba Loron Mundiál Komunikasaun Sosiál da-47, 2013).

Proposta laboratóriu nian fahe ba área hitu hanesan tuirmai:

• Arte no katekeze
• Dramatizasaun no katekeze
• Múzika no katekeze
• Banda dezeñada no katekeze
• Fotografia no katekeze
• Produsaun video ba katekeze
• Multimedia, Internet no katekeze

Irmán sira fahe ba grupu lima no prepara enkontru katekeze nian ida hodi uza proposta sira iha leten.

Finalidade proposta laboratóriu nian mak Katekeze ida ne’ebé la limita an de’it atu ko’alia, maibé halo: kria imajen no narrasaun, hamosu kriatividade, komunika iha komunidade.