Papa Francisco molok Angelus (16 Setembru 2018)

Maun no biin-alin sira, bondia!

 

Iha pasajen evanjélika ohin nian (kf Mc 8,27-35), mai fali pergunta ne’ebé atraversa Marcos nia Evanjellu tomak: sé mak Jezús? Maibé iha ne’e Jezús rasik mak husu ba eskolante sira, hodi tulun sira gradualmente atu enfrenta interrogasaun kona-ba ninia identidade. Molok interpela diretamente sira, sira na’in Sanulu-resin-rua, Jezús hakarak rona husi sira saida mak ema hanoin kona-ba Nia – no Nia hatene sisi’ak katak eskolante sira sensivel liu ba Mestre nia popularidade! Tanba ne’e Nia husu: «Ema dehan saida kona-ba ha’u ne’e sé?» (v. 27). Nune’e mosu mai katak povu konsidera Jezús proofeta boot ida. Maski nune’e, loloos, Nia la iha interese ba sondajen sira no ema nia gossip. Nia mós la aseita katak eskolante sira hatán ba ninia pergunta ho fórmula ne’ebé prepara antes, hodi sita personajen famozu sira Sagrada Eskritura nian, tanba fiar ne’ebé redús ba fórmula  sira mak fiar miópe ida.

Na’i hakarak atu ninia eskolante sira horisehik no ohin nian estabelese ho Nia relasaun pesoál, no nune’e simu nia iha sira-nia sentru sira-nia moris nian. Tanba ne’e nia dudu sira atu tau  iha sira-nia oin lia-loos tomak, no husu: «Maibé imi, imi dehan ha’u sé loos?» (v. 29). Jezús, ohin, diriji pergunta ida-ne’e direta no konfidensiál mai ita ida-idak: “Ó, dehan ha’u sé loos? Imi, imi dehan ha’u sé loos? Ha’u mak sé loos ba ó?”. Ema ida-idak simu bolun atu hatán, iha nia fuan rasik. Hodi husik roman ne’ebé Aman fó atu koñese ninia Oan Jezús leno nia. No bele mós akontese ho ita, hanesan ho Pedro, atu afirma ho entuziazmu: «Ita mak Kristu». Maibé bainhira Jezús dehan sai momoos mai ita buat ne’ebé Nia dehan ba eskolante sira, katak ninia misaun kumpre la’ós iha lurón boot susesu nian, maibé iha dalan susar Atan Terus-Na’in nian, ne’ebé ema hatun, rejeita no hedi iha krús, entaun bele mós akontese mós ho ita, hanesan ho Pedro, atu  protesta no rebela tanba ida-ne’e kontráriu ho ita-nia espetativa sira, ho ita-nia espetativa mundana sira. Iha momentu sira-ne’e, ita mós merese atu simu Jezús nia reprovasaun: «Bá iha ha’u nia kotuk, Satanás! Tanba ó la hanoin hanesan Maromak, maibé hanesan ema sira» (v. 33).

Maun no biin-alin sira, profisaun fiar iha Jezús Kristu labele para iha liafuan sira, maibé husu atu sai auténtiku ho hilin no jestu konkretu sira, ho moris ida marka ho domin ba Maromak, ho moris boot, moris ida ho domin maka’as ba maluk sira. Jezús dehan mai ita katak atu tuir Nia, atu sai ninia eskolante sira, presiza hakribi an rasik (kf v. 34), katak hakribi ita-nia orgullu egoista nia hakaran sira, no lori krús rasik. Hafoin Nia fó ba ema hotu regra fundamentál ida. No sá loos regra ida-ne’e? «Ema ne’ebé hakarak so’i nia moris rasik sei lakon moris. Dalabarak iha moris, tanba razaun barak, ita sala dalan, hodi buka ksolok iha sasán sira de’it, ka iha ema sira ne’ebé ita trata nu’udar sasán sira. Maibé ksolok ne’e ita bele hetan de’it bainhira domin, ida loos nian, hasoru ita, halo surpreza mai ita, muda ita. Domin muda buat hotu! No domin bele mós muda ita, ita ida-idak. SasinSantu sira-nian hatudu ida-ne’e.

Atu Virjen Maria, ne’ebé moris ninia fiar hodi tuir fielmente nia Oan Jezús, tulun ita mós atu la’o iha ninia dalan, hodi gasta ho laran-luak ita-nia moris ba Nia no maun-alin sira.