“Imi halo tuir buat ne’ebé Nia haruka” ( Jo 2: 5)

Venilale – Ami nia agradesimentu tinan ida ne’e hahú iha dia 2 de Setembru  to’o dia  12 de Setembru, nune’e hahú reza ba orfaun, kolaborador/a sira, formande; Pre-aspirante; Aspirante,  loron loron ba obras hotu iha komunidade nia laran.  No iha dia 11 de setembru Komunidade relijioza FMA , hamutuk ho kolabora/o sira no orfaun sira liuliu 3⁰ ano ami halo Lectio Divina hamutuk, material ba lectio divina ami uza ida-ne’ebé  prepara husi Ispetoria ne’ebé ami la konsege atu halo, nune’e ami modifika tuir ami nia realidade. Tuir mai Aspirante Ana Luzita no Pre-Aspirante Lucia  sei fahe ninia esperiénsia pesoal:” ha’u apresia tebe-tebes ba festa agradesimentu ba tinan ida ne’e nian, tanba ami halo Lectio Divina hamutuk ho madre sira, orfaun no kolabora/o sira, lectio divina halo ami haklean liu tan Maromak Nia Futar Lia liuliu testu kona-ba Kazamentu iha Kanaan Galileia nian. Parte ne’ebé ami hotu fahe maski orfaun sira mak: “Tua saida mak sei falta iha ha’u nia moris? Saida mak ha’u sei halo hanesan Maria ne’ebé halo tuir buat ne’ebé Na’i haruka.  Ba ha’u nia parte ha’u sente furak no riku liu tanba ami hotu-hotu fahe ami  nia esperiénsia rasik ne’ebé kona-ba ami nia moris no ikus mai ami haka’as atu moris tuir iha ami nia moris loron loron nian. Hotu tiha ema hotu husu se karik di’ak, fulan ida halo lectio divina dala ida.

No iha dia 13 de Setembru Misa Agradesimentu ho konfraternizasaun hamutuk. Iha loron agradesimentu sai momentu ne’ebé furak no riku liu, tanba husi parte ida-idak ; irman sira, formande, kolaborador/a sira, orfaun, hotu hotu  konxiente  tanba sa mak tenki agradese tinan tinan. Nune’e loron tomak sai momentu agradese nian, liuhusi muzika han hamutuk iha komunidade no kontinua ho Eukaristia iha  oras tuku :16:00 loraik iha Parokia. Durante Ómelia Padre Julio Mota, SDB nu’udar ami nia kapelaun dehan: ha’u siik deit halo festa agradesementu ne’e tamba karik atu remata ona tinan, ka ba Madre sira karik ka tamba iha bee nune’e imi haksolok nafatin maibé ami iha kraik kuran nafatin ba bee. Iha buat barak ne’ebé hakarak atu agradese ho sentimentu ksolok nian, hanesan iha leitura rua ohin ne’e ne’ebé ko’alia kona ba ksolok. Entaun wainhira ita hatene agradese ka fo obrigadu ne’e tenki mai husi sentimentu ksolok nian; ksolok ne’e laos tamba susesu ida ne’ebé ita hetan ka iha tempu barak ne’ebé ita bele aguenta ho buat oi-oin ne’ebé mosu ne’ebé dalaruma mai korta ita nia hanoin, dalan, ne’ebé mos dalaruma mai perturba ita maibé tamba Maromak hadomi ita no ita mak Ninia oan sira nune’e ho Ninia domin los ida ne’e mak halo ita sei hateke malu, bele dad iis no bele kontinua agradese ba malu.

2⁰ Ita iha razaun atu agradese ka fo obrigadu ba Maromak laos tamba hahan, be, merenda ne’ebé sempre iha, ka madre sira ne’ebé hamnasa nafatin maibé tamba ita iha relasaun diak ho Maromak; laos mos tamba problema sira ne’ebé mosu iha Madre sira nia komunidade, iha pesoa/ individu ida-ida ka iha ita ida-idak maibé tamba ita hotu hakarak atu kontinua relasaun ne’ebé diak ho Maromak, hanesan Saun Paulo dehan: kona ba buat seluk buat hotu neébé mos npo los, buat hotu domin no laran diak no bele hahí mak bele halo ita iha duni relasaun diak ho Maromak.

3⁰  Ita nia sentidu grtidaun ida neé tenke lori ita haklaken ksolok evanjellu nian ba ema seluk hanesan Nain Feto, Jesus no eskolante sira ne’ebé simu mos konvite ba festa no wainhira tua laiha ona Nain Feto dehan ba Jesus: “Sira nia tua hotu ona” husi ne’e ita bele interpreta buat oi-oin maibé ba alin sira ita bele dehan: karik imi nakar oituan halo Madre sira lakon pasiensia, karik dalaruma kuran hahan…..

Jesus halo be nakfilak ba tua iha pasajen importante liu mak Jesus dehan: “imi tau be ba kusi sira ne’e to’o nakonu”  ita bele hatama ita nia an iha ne’ebá atu Jesus bele nakfilak ita sai tua ne’ebé diak atu lori ba ema seluk, tua ida ne’e mai husi buat ne’ebé diak, los no mos.

Dalaruma atu fahe ksolok ida ne’e disfisil oituan tamba dalaruma ita hanoin deit ita nia an ka buat ruma taka netik ita atu fahe ksolok ida ne’e maibé ita tenki brani atu husik buat ne’e hotu ho komprimisu atu nune’e bele fahe ksolok ne’e ho ema seluk ida ne’e mak ita hotu nia misaun. Hamutuk ho Nain Feto ne’ebé ohin ita selebra nia naran atu ho Ninia Oan Jesus bele tulun ita  halo tuir buat ne’ebé Maromak hakarak mai ita ida-idak.

Missa hotu tiha hotu-hotu tun ba orfanatu atu han hamutuk. Han hotu tiha, hotu haksolok hamutuk hodi loke prezente husi kolabora sira no orfaun hafoin atraksi. Iha tempu hanesan voluntaria nain 2 Livania no Brigita mos agradese ba madre sira no alin orfaun sira ne’ebé simu sira atu halo sira nia esperensia durante fulan 6 nia laran, sira nain 2 sei ba ferias hamutuk ho familia no kontinua halo sira nia dixernimentu ba sira nia vokasaun. Hotu madre Cecilia prepara orasaun ho Power Point kona-ba agradesimentu no agradese ba parte ida-idak.

(Cesarina correia)