Liturjia Domingu da-24 Tempu Komún nian dehan mai ita katak dalan realizasaun nakonu ema nian liuhusi obediénsia ba Maromak nia projetu sira no liuhusi don totál moris nian ba maun-alin sira. Dalan ne’e la lori ba frakasu, hanesan mundu hanoin, maibé ba ema nia realizasaun loos.

Leitura dahuluk aprezenta mai ita profeta anónimu ida, Maromak bolu atu fó sasin liafuan salvasaun nian no, atu kumpre misaun ne’e, nia enfrenta persegisaun, tortura, mate. Maski nune’e, profeta konxiente katak nia moris la’ós frakasu ida: ema ne’ebé konfia iha Na’i no buka moris iha fidelidade ba Ninia projetu, sei manán persegisaun no mate. Sarani dahuluk sira haree iha “Jahwéh nia atan” ne’e figura Jezús nian.

Iha Evanjellu, Jezús mak Mesias libertadór, ne’ebé Aman haruka atu oferese dalan salvasaun nian no moris nakonu ba ema sira. Hodi kumpre Aman nia planu, Jezús hatudu ba dixípulu sira katak dalan moris loos nian la liu husi triunfu no ézitu umanu sira, maibé liuhusi domin no don moris nian (to’o mate, se presiza). Jezús la’o tuir dalan ne’e; no ema ne’ebé hakarak sai nia dixípulu, tenke aseita la’o tuir dalan hanesan.

Leitura daruak fó hanoin ba fiar-na’in sira katak sequela Jezús nian la konkretiza ho liafuan furak sira eh ho teoria ne’ebé elabora funan-funan, maibé ho jestu konkretu domin nian, partilla nian, servisu nian, solidariedade ba maun-alin sira.

Download