Baucau – Loron Setembru 2018, ami komunidade Santa Teresa d’Avilla Baucau, halo festa agradesimentu komunidade nian. Tema ba festa ida ne’e mak “Melodia agradesimentu nian”. Nu’udar saleziana ami haka’as an hodi la’o no  moris tuir buat ne’ebé mak ita-nia aman Don Bosco husik hela mai ita nu’udar tradisaun maibé liuliu atu ema ida-ida hatoman an hodi agradese malu ba buat di’ak ne’ebé irmã ka ema ida halo ba Instituto no ba Kreda, nune’e ami agradese ba irmã ida-ida , benfeitór, kolaborador, komunidade edukativa, ADMA  no padre salezianu sira ne’ebé tebes kolabora ho ami dereitamente maibé mós ne’e nu’udar atu hametin relasaun no komuñaun entre familia saleziana.

Iha festa agradesimentu ne’e ninia lalaok mak tuir mai ne’e: Santu Eukaristia nu’udar we matan komuñaun nian tan ne’e uluk knanain tuku 6.00 lokraik Misa hamutuk ne’ebé selebrante Padre Agnelo Jeronimo Moreira, diretor komunidade SDB  Baucaun nian.

Atu festa ne’e sai solene liu tan ami hili leitura sira ne’ebé adata ba tema agradesimentu nian, nune’e premeira leitura foti husi Jer.1,4-10, no segunda leitura 1kor.12, 4-26 no Evanjellu husi Jo 15,1-17.Bazeia ba leitura sira ne’e, pe. Agnelo iha nia umilia nia dehan: “Maromak bolu ita la’os tanba ita mak matenek liu, la’e nia bolu ita tanba Nia domin ba ita espesial, tan ne’e domin esije ita atu hadomi malu, nu’udar segunda leitura haktuir mai ita kona-ba membru sira ita-nia isin lolon nia funsaun sira, matan funsaun atu haree, liman atu serbi nst. Maske iha membru oinoin maibé isin lolon ida de’it. Moris iha komunidade dalaruma la’os fasil maske ita hatene katak ita presiza moris iha komuñaun maibé dalabarak ita-nia hahalok sira hatudu oin seluk. Hahalok kompetisaun nian, “ha’u mak matenek nune’e ha’u deit mak hatene” laran moras ba malu tanba ida seluk hatene liu ha’u, nst. Hahalok hirak ne’e sobu relasaun. Maske nune’e Maromak bolu ita no hanorin ita atu iha hahalok no hanoin hanesan Nia. Moris nu’udar konsagrada presiza iha mentalidade Maromak nian, hanoin hanesan nia hanoin, hadomi hanesan nia hadomi. Hafoin nia fó ezemplu dehan: “Jezús lahewai Judas Iskriota ne’ebé faan Nia no Pedro ne’ebé nega Nia. Sira na’in rua nia hahalok hasoru Jezús hotu hanesan, ida faan ida seluk nega, sira na’in rua hotu areprende ba sira-nia sala, Judas soe osan hodi dehan ha’u lakohi osan ne’e, nia arepende, maibé nia lafila ba Jezús… nia hadook an no halai ba aihun mate nian, nia ba tara an no mate. Pedro arepende no fila fali ba Jezús no rekoñese Ninia aikruz santa, no hela ho Nia to’o mate no moris hias.

Moris hamutuk maske iha difikuldade oinoin maibé ita hola atitude Pedro nian, fila fali ba Jezús, hateke ba Nia, ho ida ne’e de’it ita bele persevera iha ita-nia vokasaun”. Nu’udar tema ne’ebé imi hili ba festa agradesimentu ne’e, ita hotu hatene katak nota ida de’it mak lian la fó sai armonia, nota sira husi do rendah to’o do aas liu, ida ne’ebé mak halo ema senti armonia, nota ida de’it mak sala mós ema senti kedas.

Iha Santa Misa ne’e partesipa husi ami-nia benfeitór sira hanesan Sr. Bartolomeo no nia familia, komunidade SDB Baucau no iha mós foin-sa’e feto sira husi komunidade Salesianu sira nian. Hotu tiha santa Misa ne’e ami iha mós konfraternizasaun ka han kalan hamutuk no fahe ksolok hamutuk to’o tuku 10.30. No nu’udar komunidade ami agradese ba superiora Ir. Sanzinha, salezianu no benfeitór sira hodi hananu knananuk agradesismentu nian. Ho ida ne’e ami hakotu ami-nia sorumutu.

(Lucia Pereira)