CARTA PASTORAL – Advento 2013 (Diocese de Baucau)

Reverendos Párocos, reverendos Padres Comunidades religiosas

 

Sarani doben Diocese Baucau nian, la kleur tan ita hahú tempo litúrgico foun, katak Uma kreda,hanesan tinantinan halo, convida ema ida-idak, liliu sarani sira, atu hanoin kona ba ita nia moris iha mundo. Wainhira ita lao dadaun atu ramata tinan tuan, tempo advento lori ita atu hanoin no haré ita nia moris ba kotuk no ba oin. Haré ba kotuk, atu ita tetu no sukat ita nia moris, liu housi hahalok sira nebee ita halo tiha ona. Haré ba oin atu hadia liu tan buat diak sira nebee ita halo ona. Buat nebe la diak ba ita nia moris, nuudar ema no sarani, ita sei buka hakaas an atu hadook ka atu hasees an housi buat sira ne’e duni.

Iha tempo advento tinan ida ne’e nian ha’u convida diocese tomak atu hanoin hamutuk ho Amo Papa kona ba problema balu Família nian nebee preocupa teb-tebes Amo Papa. Tempo advento tempo atu hanoin kona ba Mistério Incarnação nia significado ba mundo tomak. Mistério ida ne’e maka sai hanesan Naroman boot atu ita compreende ita ema nia moris iha tempo no situação hot-hotu. Wainhira ita ema moris iha confusão nia laran,ita tenki fila nafatin ba ita ema nia estatuto: Ita ema Maromak nia ilas. tan atu manaan nia ilas ida ne’e maka Maromak halo an ba ema, tuir ita ema nia dalan. Ita koko hanoin hamutuk mensagem Natal nian ba Familia iha tempo ida ne’e, wainhira mosu doutrina no ideia barak kona ba família nia fatin iha mundo. Amo Papa haruka surat ida ba bispo sira mundo tomak nian atu husu sarani hot-hotu nia hanoin kona ba família nia fatin iha mundo, iha sociedade no iha kreda ohin loron nian. Nune’e amo Papa hakarak halibur bispo sira mundo tomak nian iha fulan outubro 2014 no 2015 atu hanoin deit kona ba tema ida ne’e. Tan ne’e mos maka Vigararia Episcopal hakarak sensibiliza ona Comunidade sarani diocese nian ba realidade ida ne’e iha tinan ida ne’e.

Assunto foun kona ba família iha tempo ida ne’e no mos situação balu nebee preocupa Uma Kreda.

Iha surat Amo Papa nian ita bele le assunto no Preocupação balu hanesan tuir mai ne’e: “Ohin loron ita hasoru malu ho problema foun lubuk ida; hahu housi casais sira nebee hakarak moris hamutuk deit, nunca kaben, no mos iha caso balu nunca hanoin atu kaben; iha mos ema sira nebee sexo hanesan maibe moris hamutuk hanesan kaben nain, no dala barak ema hatan atu sira bele hakiak oan. iha situação foun sira leet, ita tenki hanoin hirak nebee kreda tenki fo atenção: matrimónio misto ou intra-religioso, katak kaben nain sira religião la hanesan; família monoparental katak hatene deit inan ou hatene deit aman; poligamia (ita nia lia timor dehan kama barak); casais sira nebee moris hamutuk laos tan hili malu ou hadomi malu, maibe inan-aman sira maka combina deit atu hafolin, hanesan fali atu selu feto ho folin ida; movimento feministas, nebee defende direito feto nian maibe la simu kreda nia hanorin; ideia família nian la hanesan housi rai ida ba rai seluk, housi cultura ida ba cultura seluk; iha nação balu hamosu lei nebee ohin loron la fo folin ba fidelidade vida kaben nain nian; mosu mos ideia foun nebee aluga feto seluk nia isin (kabun) atu bele kous labarik ida, maibe feto ne’e laos labarik nia inan; ideia sira nebee direitos humanos fo sai kona ba kaben nain sira nia vida. Iha Kreda laran mos, ema hahu lakon fiar ba sacramento kaben no mos la fiar ona iha sacramento nia kbiit,liliu sacramento penitencia nuudar aimoruk ba klamar. ho buat sira ne’e hotu ita haré tan saa bispo sira mundo tomak nian tenki fo atenção ba desafios hirak ne’e”.

Tentação balu

Wainhira ita sarani timor oan sira le amo Papa nia preocupação sira ne’e, ita bele iha tentação balu nebee bele mosu mai ita nia hanoin

1-Tentação ida maka ita bele simu katak situação sira ne’e hotu acontece duni ona iha mundo,iha rai seluk, maibe iha timor ladauk tama. la hatene.

2-Tentação ida fali, ita bele hanoin katak rai timor-leste maioria católico, ne’e duni buat sabraut sira hanesan ne’e sei la acontece. Ita labele taka matan.

3-Tentação ida fali atu lalika halo buat ida. Se mundo tomak, ema hotu hanoin, halo no tuir ona dalan ida, Uma kreda hakarak hanorin dalan seluk hodi halo saa ida? hafoin ohin loron see los maka atu rona fali lia fuan sira nebee husu sacifício ou lia fuan sira contra fali isin lolon nia precisa no isin lolon nia tendência (kan isin nian)?

“Se maka hakarak tuir ha’u mai”

iha situação sira hanesan ne’e maka ita sarani tenki hatene hatan ba ita an rasik kona ba problema sira hotu nebee ita hasoru ohin loron,no nune’e bele fo mos naroman ba maun alin sira seluk. Natal fo naroman ba família nia fatin iha mundo. Mensagem Natal nian hanorin katak Jesus,Nai Maromak oan halo an ba ema; maibe mos Natal hanorin katak Nai Maromak oan halo an ba ema iha kadunan ida nia laran: kadunan ne’e maka ita hanaran família nebee harii housi mane ida ho feto ida nia hadomi malu. Ponto rua ne’e, EMA (PESSOA HUMANA) HO FAMÍLIA, maka cultura ohin loron nian hakarak sobu tiha, tan valor rua ne’e maka sai rin beci ba sociedade humana. Sobu tiha família, ita ema sama rai la metin.

Sobu tiha criatura ema nia folin, ita sai hanesan mos balada sira; wainhira hamihis tiha criatura ema nia valor, família mos lakon nia folin. Natal, tempo atu hanoin kona ba mistério incarnação iha mundo, mistério ida ne’e iha situação sabraut sira leet,situação sira nebe ita ema no kreda hasoru ohin loron. Mistério ida ne’e obriga ita atu haré ba fundamento fiar nian. Cristo mai atu hafoun mundo no fo naroman ba mundo. Maibe nuudar S. João dehan iha nia Evangelho,” nia mai ba nia emar sira maibe sira ne’e lakohi simu nia”. Ba ita sarani dilema boot: nuudar ema, ita moris iha mundo. Cristo mai atu hafoun mundo maibe mundo lakohi simu nia. ita sarani atu tau ita an iha nebe? Simu Cristo nia doutrina ka nega nia doutrina?

Iha tempo sira nebe mosu confusão boot no barak hanesan ne’e, maka fiar iha Jesus Cristo no tuir nia ne’e sai desafio boot ba sira nebe hakarak tuir nia. Ita hotu hatene ita nia MESTRE NIA LIAFUAN:” SE MAKA HAKARAK TUIR HA’U MAI…”. Atu ramata ita hotu bele halo interrogação ba malu: Família Católica, o dehan saa ida kona ba o Nia an rasik?

Bom Advento, Boas Festas do Natal no Feliz Novo ba diocesano sira hotu!

Baucau, 24 de Novembro de 2013

D. Basílio do Nascimento Bispo de Baucau

 

Oração ba Família

Na’i Jesus Cristo,haraik bênção mai ami nia família no horik hamutuk ho ami iha tempo di’ak no mos iha tempo aat be ami nia família hasoru. Na’i Jessus Cristo, hanorin ami reza, loke ami nia fuan atu ami bele pedua malu wainhira ami hirus malu; loke ami nia hanoin atu hatene simu malu wainhira ami aat ba malu. Hadook tiha hosi ami babeur sira ne’ebe bele sobu ami nia família, haketak malu, soe malu.

Na’i Jesus Cristo, Ita Boot nia inan sai Maromak nia atan nuudar atan, nia rai metin iha ninia futar fuan laran Ita Boot nia liafuan. halo ami nia fuan nakloke ba ita boot nia liafuan no bele moris tuir iha ami nia família laran.halo ami nia Inan moris tuir Ita Boot nia inanlaran badinas tulun malu hadomi oan sira ho domin los nia hadomi ami nia aman ho domin mos nia.

Na’i Jesus Cristo,ita boot nia aman-haki’ak,moris nuudar aman ida justo no serviço na’in.halo ami nia aman sira moris tuir exemplo São José nian. Hanorin ami aman sira atu iha paciência hasoru bebeur sira hotu. Educa oan sira iha domin los nian, hadomi ami nia inan ho domin mos nian, resolve problema uma laran nian la’os hodi lia kroat eh hahalok kroat sira, maibe hodi fiar ba Maromak nia kbiit no tahan família iha hasoru buat aat hotu, laran badinas nafatin tahan ami nia uma kain.

Na’i Jesus Cristo,halo ami nia oan sira fuan no neon nakloke ba ita boot nia hanorin,atu sira hadomi, respeita no tulun ba aman-inan, sira hanesan ita boot iha Nazaré hadomi, respeita no tulun ba ita nia aman-inan. haraik naroman ba ami nia oan siratuir dalan naroman no haddook an hosi buat aat tomak.haraik ita boot nia Espírito leno sira sai matenek kona ba isin no klamar tuir ita boot hanorin.

Na’i Jesus Cristo,halibur ema hotu rai klaran iha família ida de’itfamília ita boot nia kreda, atu sira hotu hamutuk iha domin ba maluhamutuk família ida de’it, domin ida de’it, Aman ida de’it, Aman Maromak. Amen!