Tinan Fiar nian, tinan santu ida ho loron sira dedika ba relijiozu sira, seminarista, katekista sira, juventude, konfraria sira, movimentu sira, asosiasaun mariana sira no kanonizasaun martir no konfesór sira nian, adorasaun eukarístika iha kreda sira ho modu simultáneu, konferénsia sira, eventu kulturál sira, espozisaun ida dedika ba S.Pedro, konsertu no website ida (www.annusfidei.va.). Tinan ne’ebé iha mós nia logo [forma husi kuadradu ida ho ninin no iha klaran Kreda simboliza ho roo, ne’ebé navega iha tasi ho laloran mínimu. Roo nia mastro maka krús ho vela sira hatudu ho sinál dinámiku sira ne’ebé forma tetagrama Kristu nian (HIS). Iha vela sira nia kotuk iha loro-matan ne’ebé asosia ho tetagrama, fó hanoin mós ba Eukaristia] no inu. Ida-ne’e tinan ida dedika, hanesan Bento dehan iha Porta fidei atu “deskobre filafali konteúdu sira fiar nian ne’ebé haklaken, selebra, moris no harohan, no reflete kona ba hahalok fiar nian, maka kompromisu ida ne’ebé fiar-na’in hotu tenke halo ninian rasik”.

 

Horisehik (21 Juñu) prezidente Konsíliu Pontifísiu ba Promosaun Evanjelizasaun Foun nian, Mons. Rino Fisichella aprezenta objetivu no eventu sira Tinan nian. Eventu ida ne’ebé sei inaugura iha loron 11 Outubru, aniversáriu da-50 inísiu Vaticano II nian, ho misa ida konselebra husi padre sinodál sira, prezidente konferénsia episkopál sira no padre konsiliár sira ne’ebé sei moris.

“Tinan fiar nian”, Mons. Fisichella esplika, “ulknanai iha objetivu atu suporta fiar-na’in sira nia fiar ne’ebé, iha fatiga lorloron nian, la para atu saran sira-nia moris, ho konviksaun no korajen, ba Nai Jezús Kristu. Sira-nia sasin ho valór boot ne’e, ne’ebé lahó novidade iha ema nia oin, maibé kamurak iha Maromak, maka fó kbiit atu Kreda aprezenta nia an iha mundu ohin nian, hanesan nia halo iha pasadu, ho kbiit fiar nian no entuziazmu ema simples nian. Tinan ne’e,  enkaixa iha kontestu luan ida marka ho krize jerál ne’ebé afeta mós fiar. Ita nia idade kontemporánea, ne’ebé submete an iha dékada barak nia laran ba atake sekularizmu nian ne’ebé hodi autonomia individuál nia naran ezije independénsia husi autoridade hotu, no iha-ne’ebe halo nu’udar nia programa “moris iha mundu hanesan Maromak la eziste”, dala barak nia la hatene oinsá hatuur nia an. Krize fiar nian maka espresaun dramátika krize antropolojikál ida ne’ebé husik ema ba nia an rasik, no lahó meta ida atu dirije nia moris bá. Nesesáriu liu atu hakat liu pobreza espirituál iha-ne’ebé ita-nia kontemporáneu barak hasoru, mane no feto sira ne’ebé la sente ona Maromak nia auzénsia, nu’udar auzénsia ida ne’ebé tenke kura. Tinan Fiar nian sei sai dalan ida komunidade sarani oferese ba sira ne’ebé moris ho hakaran no nostaljia atu hasoru fali Maromak. Nune’e nesesáriu liu atu fiar-na’in sira oferese akompañamentu fiar nian, atu sai besik ba sira ne’ebé husu razaun ba ita-nia fiar.”

Ida-ne’e maka kalendáriu eventu sira-nian aprezenta iha loron 21 Juñu. Eventu ho karakter universál de’it mak Amu-Papa sei marka nia prezensa.

• Abertura solene Tinan Fiar nian sei iha fatin iha Prasa S. Pedro iha Kinta, loron 11 Outubru, aniversáriu da-50 inísiu Vaticano II nian. Sei iha misa solene ida konselebra husi padre sinodál sira, prezidente konferénsia episkopál sira no padre konsiliár sira ne’ebé sei moris ne’ebé konsege tuir eventu.
• Eventu dahuluk Tinan nian, domingu, 21 Outubru, maka kanonizasaun ba martir no konfesór fiar nian na’in neen. Sinál ne’e ko’alia kona-ba nia an rasik. La’o tuir buat ne’ebé hakerek iha Porta fidei: “Hodi fiar, iha tinan atus ba atus nia laran, mane no feto sira husi otas hotu, iha-ne’ebé sira nia naran hakerek iha Livru Moris nian, konfesa beleza tatuir Jezús Kristu nian no simu bolun atu fó sasin kona-ba sira-nia an nu’udar sarani”(PF 13). Sira ne’ebé sei kanoniza maka: Jacques Barthieu, amlulik jezuita no martir misionáriu iha Madagascar (1896); Peter Calungsod, katekista leigu, martir iha Filipinas (1672); Giovanni Battista Piamarta, amlulik italianu no sasin fiar nian iha edukasaun foin-sa’e sira-nian (1913), Madre Marianne (Barbara Cope) sasin fiar nian iha kolónia lepra sira nian iha Molokai (1918), Maria Monte Carmelo nian, relijioza iha España (1911), Catherine Tekakwitha, Indiana leiga konverte ba katolisizmu (1680), no Anna Schäffer, leiga husi Baviera sasin kona-ba Kristu nia domin iha nina terus sira (1925). Ita sei iha oportunidade atu reflete no reza ba sasin sira ne’e ne’ebé moris iha eroízmu no Kreda foti sira nu’udar ezemplu fiar nian.
• Iha loron 25 Janeiru 2013, selebrasaun ekumenikál ne’ebé tinan-tinan hala’o sei iha karakter ekumenikál solene no sei reza hamutuk iha Bazílika S.Paulo (fuori le mura) nian. Hamutuk sira sei profesa fiar komún sarani sira nian ne’ebé simu batizmu hanesan nune’e keta haluha dalan ba unidade nu’udar sinál vizivel atu oferese ba mundu.
• Sábadu loron 2 Fevereiru, selebrasaun ba ema hotu ne’ebé dedika sira-nia moris ba Nai ho profisaun relijioza. Sira sei halibur iha Bazílika S. Pedro ba orasaun komún ida atu fó sasin katak fiar husu sinál konkretu ne’ebé iha objetivu atu hamoris esperansa iha Nai ne’ebé sei mai.
• Domingu Ramus, 24 Marsu, hanesan sempre halo, dedika ba foin-sa’e sira ne’ebé prepara an ba Jornada Mundiál Juventude nian.
• Domingu, 28 Abríl, sei dedika ba foin-sa’e mane no feto sira ne’ebé sei simu sakramentu Krizma. Amu-Papa sei fó Krizma ba grupu ki’ik ida foin-sa’e sira-nian nu’udar sain ba profisaun públika fiar nian  nu’udar konfirmasaun ba ida-ne’ebé halo ona iha Batizmu.
• Domingu, 5 Maiu sei dedika ba selebrasaun fiar nian ne’ebé hetan espresaun inisiál iha piedade populár no pasa husi tempu ba tempu ho forma partikulár fiar nian liuhusi konfraria sira.
• Vijília Pentekoste nian, 18 Maiu, sei dedika ba movimentu sira, tuan no foun sira, ho peregrinasaun ba S’ Pedro nia sepulkru, nu’udar sasin ida fiar nian husi ida-ne’ebé iha loron Pentekoste loke odamatan uma nian ba prasa no lurón sira atu haklaken Kristu nia moris-hi’as. Iha prasa S. Pedro nian ita sei husu Nai atu haruka ninia Espíritu dala ida tan ho abundánsia atu hafoun milagre sira, hanesan iha tempu dahuluk sira Kreda nian.
• Iha festa Corpus Domini, Domingu, 2 Juñu, ita sei iha adorasaun eukarístika solene ne’ebé sei halo ho modu simultáneu iha mundu tomak. Iha katedrál sira dioseze ida-idak nian no iha kreda hotu, sei posivel atu iha oras hanesan, ema halo esperiénsia silénsiu kontemplasaun nian nu’udar sasin fiar nian neebé kontempla Maromak nia mistériu moris no horik iha ita leet ho nia Isin no Raan.
• Domigu 6 juñu, sei dedika ba sasin Evanjellu moris nian, ne’ebé sempre haree Kreda nu’udar promotór defensór ema nia dignidade husi momentu dahuluk moris nian to’o momentu naturál ikus moris nian.
• Domingu 7 Jullu, sei iha konkluzaun peregrinasaun nian ne’ebé seminarista sira, novísiu sira, no sira ne’ebé hili dalan vokasionál halo. Sira sei hatudu ba públiku ksolok atu tuir Nai iha servisu Kreda nian.
• Husi Jullu 23 to’o 28, Jornada Mundiál Juventude nian iha Rio de Janeiro sei sai, hanesan baibain, dalan ida nia tutun ne’ebé sei hatudu foin-sa’e sira husi mundu tomak  iha enkontru haksolok nian atu hateten ba ema hotu fiar nia importánsia.
• Loron 29 Setembru sei dedika ho modu partikulár ba katekista sira, atu halo klaru katekeze nia importánsia iha fiar nia baburas no komprensaun intelijente no sistemátika fiar nian liga ho moris pesoál no komuidade nia baburas. Ida-ne’e sei sai oportunidade ida atu hanoin kona-ba aniversáriu da-20 publiksaun Katesizmu Kreda Katólika nian.
• Domingu 13 Outubru sei haree prezensa realidade mariana sira hotu nian atu hatudu oinsá Maria Virjen, Maromak nia Inan, íkone ida fiar nian ba fiar-na’in hotu. Hodi ninia  konfiansa no obediénsia ba Aman nia hakaran bele kumpre kmanek oioin.
• Iha Domingu 24 Novembru, finalmente, sei selebra loron ikus Tinan Fiar nian.

Atu bele hatene liután bele tuir inisiativa sira loron ba loron iha website www.annusfidei.va.