Dili – Tinan-tinan Inspetoria FMA TIN halo festa Gratidaun hamutuk no iha oportunidade ne’e iha mós formasaun ba kolabora direta sira Inspetora nian, katak Diretora uma nian. Formasaun ne’e hala’o iha loron 7 ho tema “MJS tinan 30 ona”, iha-ne’ebé Inspetora aprezenta surat sirkulár husi koordenadór SDB no koordenadora FMA Ámbitu Pastorál Juveníl (Pe Fabio Attard no Ir Runita Borja).

MJS moris iha tinan 1988 durante “Confronto 88”, tinan sentenáriu Don Bosco nia mate nian. Halo husi  28 Agostu to’o 4 Setembru 1988.

Surat ne’e, hodi liga mós ho Instrumentum Laboris Sínodu Joven iha Outubru 2018, aprezenta liña empeñu MJS nian iha área tolu: área espiritualidade, área asaun no área komuñaun no koordenasaun nian.

Kona-ba área espiritualidade Pe Attard no Ir Runita subliña kona “esperiénsia fiar nian tuir espiritualidade loron-loron nian”, hodi hamoris fali elementu importante ruma espiritualidade ida ne’e nian: “Interioridade, Dixernimentu no Akompañamentu”. Iha área asaun nian membru sira integra moris ho fiar no ninia indikadór sira mak “MJS sai protagonista”, no barani fó kontribuisaun ba moris sósiu-polítika, ho hafoun opsaun preferensiál ba kiak sira. Iha área koordenasaun no komuñaun, presiza  “haburas MJS nu’udar espresaun empeñu edukativu no misionáriu Família Saleziana tomak nian”. No atu koordena presiza iha “estrutura minimál”, ne’ebé “joven sira rasik mak sai protagonista, la’ós SDB no FMA sira mak organzia no programa no joven sira sai ezekutór de’it”.

Loron ne’e remata ho rozáriu espesiál ba Ir Alma Castagna, provinsiál, véperas no selebrasaun festa, iha-ne’ebé Irmán Diretora sira prepara video clip ida haktuir fali akompañamentu ne’ebé Ir Alma realiza iha tinan 2018.

“Ami agradese tan ita la’o hamutuk ho ami hanesan Na’i-Feto”.