Liturjia domingu da-22 propoin mai ita reflesaun kona-ba “Ukun-fuan”. Maromak hakarak ema nia realizasaun no moris nakonu no, iha sentidu ida-ne’e maka nia propoin Ninia “Ukun-fuan”. Maromak nia “Ukun-fuan” hatudu ba ema dalan atu nia la’o tuir. Maski nune’e, dalan ne’e la hotu de’it iha halo-tuir ritu no prátika sira mamuk iha signifikadu, maibé prosesu ida konversaun nian ne’ebé lori ema atu kompromete an ba beibeik ho domin ba Maromak no maun-alin sira.

Leitura dahuluk garante ita katak “lei sira” no norma sira Maromak nian maka dalan seguru ba ksolok no moris iha plenitude. Tanba ne’e, autór katekeze ida-ne’e nian hameno nafatin ba nia povu atu simu Maromak nia Liafuan no husik nia leno sira.

Iha Evanjellu, Jezús denunsia atitude ema sira nian, ne’ebé halo nu’udar valór absolutu, hahalok moris tuir “lei” husi li’ur no ho modu superfisiál, hodi haluha katak “lei” maka dalan ida de’it atu to’o ba kompromisu efetivu ho Maromak nia projetu. Iha Jezús nia perspetiva, relijiaun loos la tau iha sentru kumpre-tuir ho modu formál “lei sira”, maibé iha prosesu konversaun nian ne’ebé lori ema ba komuñaun ho Maromak no atu moris iha partilla domin nian ho maun-alin sira.

Leitura daruak konvida fiar-na’in sira atu rona no simu Maromak nia Liafuan; maibé nia fó hanoin katak, Liafuan ne’ebé rona no simu iha fuan tenke sai kompromisu domin nian, partilla nian, solidariedade nian ho mundu no ho ema sira.

Download