Venilale – Loron 25-08-2018, nu’udar loron istóriku ba kongregasaun FMA,  tanba iha loron ne’e Irmán jubilár na’in 3: Irmán Alexandrina Pinto, Irmán Jacinta Gusmão no Irmán Olga Belo, hamutuk ho família no Institutu, hasa’e hahí no agradese ba Maromak  ba Nia fidelidade ba Irmán sira iha tinan 25 iha vida konsagrada. Irmán sira ne’e mak Filha de Maria Auxiliadora dahuluk Timor-oan.

Selebrasaun loron espesiál ida ne’e hahú ho santa Missa iha oras tuku 10.00 otl, ne’ebé prezide husi Amu-Bispu dioseze Dili, Don Virgílio do Carmo da Silva SDB ho amululik konselebrante hamutuk 23 inklui diakónu. Partisipasaun iha selebrasaun bodas de prata, mai husi família, foin-sa’e sira, menina koléjiu sira, konvidadu sira no Irmán sira husi komunidade Inspetoria nian. selebrasaun ne’e hala’o iha parókia Sagrado Coração de Jesus Venilale, tanba fatin ne’e mak FMA sira nia prezensa dahuluk iha 1988 nia fatin.

Iha omilia Amo Bispu  agradese ba Irmán na’in tolu ne’ebé durante tinan 25 nu’udar vida konsagrada dedika sira nia moris ba Maromak no ba foin-sa’e sira  liuliu ba sira nia fidelidade ba Maromak.

Husi leitura ne’ebé ohin ita rona fo hanoin ona mai ita saida mak sira nia sentimentu, sira koko atu  deskreve ona sira nia sentimentu liu husi leitura sira, hanesan iha primeira leitura, livru kantiku dos kantikus ne’ebé hakerek kona “ Parábola do Amor” ne’ebé termina ho liafuan furak fetoran ida nian, kona ba “Forsa Domin nian”. Tan forsa domin nian mak ohin ita bele halibur hamutuk iha ne’e, tan forsa domin ida ne’e mak sira na’in tolu koko tiha ona, hanesan Don Bosco dehan ba ninia oan sira, “ Asaun Espíritu Santu  mak fonte grasa ne’ebé fo apoiu ba ninia esforso, hodi krese iha domin ne’ebé mais perfeitu”, nune’e domin ne’ebé sira hakiak husi 1993 kontinua buras too agora.  “ Nia mak tenke sai boot duni no ha’u tenke sai kiik duni, laiha se, karik no maibé, domin la karateriza liafuan hirak ne’e, hamutuk ho Irmán na’in 3 sira sai duni sasin ba domin ida ne’e hamutuk ho sira ne’ebé kiak no kiik, laos deit kiak ba aihan maibé sira ne’ebé kiak ba domin. 25 anos nu’udar Vida konsagrada hakarak dehan: sukat nia forsa liu husi buat ne’ebé nia halo, normalmente ema sukat ho susesu ne’ebé sira hala’o ona, maibé  sai relijioza no relijiozo laos sukat ho buat sira ne’e, laos atu halo buat bar-barak, maibé buat ne’ebé esensial liu mak bele fo sasin no testemunho kona  Jesus nia mate no moris hias, sasin ida tuir amo papa nia liafuan dehan, “ Alegria do Evangelho na nossa misão”,  oinsá mak ksolok evanjellu ida ne’e nian. Ita nia Irmán sira koko maski dalabarak sai diretora Komunidade, diretora da eskola ne’ebé halo Irmán sira ulun moras, tensaun, maibé ho labarik no foin-sa’e  sira nia prezensa halo ulun moras hotu lakon no tensaun sees tiha, lalika bolu infermeira atu sukat tanba ksolok, ne’e duni tenke fó, laiha buat ida ne’ebé ita la simu se Maromak la fó. Durante selebrasaun iha mós renovasaun  votus.

Hafoin  missa remata kontinua kedas serimónia konfraternizasaun iha ETV Venilale. Iha biban ida ne’e aleinde hato’o hela madre Paola Battagliona nia mensajen ba sira, madre Alma mós hato’o ninia lia menon no augúriu ba Irmán na’in tolu, liafuan kona ba fatuk murak ninia karakterístika 4: “pureza” fatuk murak labele iha nódoa, tenke sai mutin nabilan, nune’e “imi-nia moris tenke sai transparente nafatin, hanesan imi nia liafuan ne’ebé dehan ‘Nia sai boot’, no Nia sei okupa imi nia moris tomak”; segundu, kona ba karakterístika “todan”, katak “Maromak  nia prezensa iha imi nia moris todan, nune’e imi hili tuir buat ne’ebé imi hili tinan 25 liu bá; terseiru oinsá “atu sai diamante ne’ebé furak presiza ema ko’a. Iha 25 anos ne’e imi halo ona esperiénsia no  Irmán Floriana halo ona ninia esperiénsia  iha lalehan, imi husik Maromak halo ninia serbisu iha imi nia moris. Dala ida tan Parabens, e Augúriu ba tinan 25 bodas de Prata”.

(Maria Sarmento – Ines Bartolo)