Liturjia domingu da-21 Tempu Komún nian ko’alia mai ita kona-ba opsaun/hilin sira. Nia fó hanoin mai ita katak ita-nia ezisténsia bele gasta atu halai tuir valór efémeru no fuan-laek sira, ka uza atu manán valór eternu sira ne’ebé lori ba moris definitivu, ba realizasaun nakonu.

Ema ida-idak, mane no feto, loroloron tenke halo ninia hilin.

Iha leitura dahuluk, Josué tene tribu sira Israel nian halibur iha Sikém atu hili entre “serví Na’i” no serví maromak seluk. Povu, naturalmente, hili atu “serví Na’i”, basá nia haree iha istória libertasaun husi Ejitu no la’o-dalan iha iha rai-fuik maran, oinsá Jahwéh de’it bele haraik ba nia Povu vida, liberdade, moris-di’ak no dame.

Evanjellu koloka iha ita-nia oin grupu rua dixípulu sira-nian, ho opsaun lahanesan hasoru Jezús nia proposta. Grupu ida, kesi an ba lójika mundu nian, soi nu’udar prioridade soin materiál sira, podér, ambisaun no glória; tanba ne’e, sira hakribi Jezús nia proposta. Grupu seluk, nakloke ba Maromak no Espíritu nia asaun, sai disponivel atu tuir Jezús iha dalan domin no saran-an moris nian; membru sira grupu ne’e nian hatene katak Jezús de’it mak iha liafuan moris rohan-laek nian. Grupu dahikus ne’e maka Evanjellu propoin nu’udar modelu ba fiar-na’in sira tempu hotu nian.

Iha leitura daruak, Paulo dehan ba sarani sira Éfeso nian katak opsaun ba Kristu iha konsekuénsia mós iha nivel relasaun familiár. Ba maktuir Jezús nian, espasu relasaun familiár maka tenke sai fatin  iha-ne’ebé manifesta valór sira Jezús nian, valór sira Reinu nian. Ho ninia komuñaun moris nian, ho ninia uniaun, ho ninia partilla domin nian, kazál sarani simu bolun atu sai sinál no reflesu uniaun Kristu nian ho ninia Kreda.

Download