Profisaun Perpétua Votus nian

Venilale – Fulan Agostu, ba Kongregasaun Salesiana  nu’udar fulan ksolok ne’ebé nakonu ho gratidaun, hahu ho primeira profisaun ba Irmán nain 5, ordenasaun saserdotál ba Padre nain rua, no ohin loron 16- Agostu – 2018, Irmán nain rua hakarak hatan SIM ba nafatin.

Selebrasaun profisaun perpétua ne’e hala’o iha igreja parokiál “Sagrado Coração de Jesus” Venilale. Sira ne’ebé partisipa iha selebrasaun ne’e mak  Irmán nain rua nia família, Irmán FMA sira husi komunidade hotu, Padre Salesiano sira, konvidadu balun.

Selebrasaun ne’e hahú ho missa solene, iha oras tuku 10.00 dadeer, Padre provinsiál nu’udar selebrante no Padre Salesiano nain 6 ne’ebé nu’udar konselebrante. Iha omilia Padre provinsiál, Pe. Apolinário Neto hateten katak “eventu ohin la’ós buat foun ida ba Irmán nain rua, maibé sira esperiénsia tiha ona Maromak nia domin no hakarak iha tinan barak nia laran, Jezús mak  sai nu’udar sira nia prioridade, nune’e sira buka atu deskobre ksolok loos ne’ebé Maromak hakarak husi sira”. Amu Apolinário hatutan tan katak ita presiza sai “testemuña ba sira nia ksolok, atu sira nia fidelidade ba Jezús bele to’o rohan,  tanba sira nia fidelidade hodi dehan sira la perfeitu, nune’e sira tau sira nia perfeisaun iha Jezús,”. Tempu hanesan selebrasaun ida ne’e fanun mós ita ida-idak atu esperiénsia mós ksolok ida ne’e.

Ikusmai padre  fó parabéns ba Irmán nain rua ne’ebé “hala’o viajem mistériu paskál nian, hodi deskobre loloos Maromak nia hakarak hodi serví foin-sa’e no labarik sira, tuir espíritu Mornese no Valdoco nian”. Padre agradese mós ba família sira ne’ebé hatene kolabora ho Maromak nia domin, hodi entrega oan sira atu serbi  ba Jezús .

Hafoin remata selebrasaun Eukaristia,  kontinua kedas ho programa almosu hamutuk, no konvíviu iha eskoa Técnico-Vocacional S. Maria Mazzarello. Molok atu fahe malu Provinsial Madre Alma Castagna, fó Irmán nain rua nia obediénsia foun: Irmán Grinalda sei muda ba komunidade Saun João Bosco Balide no Irmán Maria da Costa sei ba Eskola Pastelaria iha Portugal. Madre Alma iha mensajen ikus hateten: “Agradese no hato’o parabéns  ba Irmán foin-sa’e sira ne’ebé  barani atu foti desizaun hodi hatán sim ba nafatin, fó resposta la’ós maizumenus maibé fó resposta totál, ne’ebé fó sasin mai ita, halo ita barani mós atu foti desizaun ba nafatin, bele kaer buat ruma ba nafatin hodi fiar no laran metin  de’it iha Maromak”.

(Maria Sarmento Guterres)