Venilale – Durante semana haat nia laran irman nain lima halo sira nia segundu novisiado iha Dili no kontinua iha Venilale. Segundu novisiadu mak tempu atu :

• Lee fali ho atetude dixernimentu iha dalan vokasaun nian no deskobre fali sinál sira Maromak nian iha moris nu’udar konsagrada ida.
• Haklean ho konxiénsia esperiénsia aliansa esponsál ho Kristu no dimensaun komunitária.
• Hafoun laran manas ba misaun, hodi lori foin-sa’e no labarik sira hamutuk iha Maria nia eskola hodi kontempla Kristu.

Durante ne’e ami reflete kona ba tópiku importante tolu: orasaun, vida fraterna no misaun.

Orasaun

Orasaun iha artigu Konstitusaun fma nia no definisaun oioin iha orasaun. Iha artigu Konstitusaun ko’alia kona ba karakteristika orasaun FMA nian mak: simples esensiál no lori ita atu nakfilak-an

Orasaun mak enkontru ho Maromak, dialogu entre oan ida ho nia Aman. Orasaun ho vida, kontempla ho asaun. Orasaun mak enkontru domin nian ho Maromak. Nu’udar oan ita imita tuir inan Virjem Maria atu hamulak hanesan nia.karakterístika orasaun Marian nian, moris intimidade ho Espíritu Santu, disponibilidade ba Maromak nia liafuan, prezensa moris no tulun no lori ita too Kristu. Iha mós tema seluk ne’ebé ko’alia kona-ba liturjia no rekonsiliasaun.

Vida fraterna

Ita nia Konstitusaun haktuir vida fraterna mak moris no serbisu hamutuk iha Nai nia Naran, servi Nai ho ksolok iha espíritu família hodi forma fuan ida no klamar ida kumpri ukun-fuan foun ne’ebe halo ema rekoinese ita nu’udar Kristu nia eskolante sira. Vida fraterna heta abut husi Santíssima Trindade. vida fraterna mak prezente ne’ebe tenke taumatan hanesan rikusoin la’os atu konserva maibe atu fo fuan abundante.

Artigu 62 haktuir Mornese iha ita nia komunidade sira, uma domin Maromak nian la’os hakerek iha parede de’it maibe hatudu uma domin iha ita ida-idak nia oin.

Misaun – Sistema domin Edukativo ohin loron

Iha  Papa Fransisco nia lia-fuan sira no ita nia sistema preventivu iha aspetu barak mak besik malu. Eduka fuan, eduka hanoin no eduka ba  asaun solidariedade nian. Karakterístika sira ne’ebe Edukadór sira tenke iha mak:

• Karakterístika umana: komprende ema seluk, respeita ba ema nia dignidade, sai tasak iha aspetu afetivo, bele tahan bainhira buat ruma laloos no hatene komunika.
• Karakteristika Espirituál sira: iha esperiénsia moris Maromak nian,iha sabedoria espirituál, moris tuir esperansa sarani no hatene serbi maluk sira.
• Knaar iha esperiénsia Espirituál: Tulun foin-sa’e sira atu hatene sira nia identidade, halo sira deskobre bolun ba santidade, husik Espíritu santu gia nia,halo sira hatene Jezús, tulun sira atu kria relasaun amizade nian ho Kristu no haburas unifikasaun moris nian.

(Aida, Ermelinda, Domingas, Maria, Grinalda)