Baucau – Dioseze Baucau ohin, iha Solenidade Na’i Jezús Kristu Liurai Universu nian, taka Tinan Fiar nian hamutuk ho selebrasaun eukarístika iha “Campo da Alegria” Baucau. Husi tuku 2 loraik, sarani sira husi fatin-fatin, parókia sira husi Manatuto, Viqueque, Lospalos no Baucau, halo manifestasaun sira-nia fiar nian hodi la’o iha prosisaun no harohan to’o fatin selebrasaun Eukaristia nian.

Marka prezensa iha selebrasaun ne’e administradór distritu haat nian mós. Irmán FMA sira husi komunidade hotu iha Dioseze hanesan Fuiloro, Laga, Venilale no Baucau partisipa iha eventu ekleziál ne’e. Amlulik na’i n tolunulu konselebra ho D. Basílio do Nascimento, Bispu Baucau nian.

Amu Basílio iha ninia omilia hahú hodi dehan katak tuir kultura Timór bainhira halo festa harii ‘panitia’ no bainhira festa remata presiza “fase meza ain”, nune’e iha Kreda mós ita halo hanesan ne’e. Amu-Papa Bento XVI tinan uluk loke Tinan Fiar nian no ohin iha Kreda tomak sarani sira taka TInan Fiar ne’e. Kreda iha mundu tomak mak pedasuk ida Jezús Kristu nia isin rasik. Amu-Bispu mós esplika signifikadu dogma nian ne’ebé signifika Uma-Kreda  nia doutrina hato’o ne’ebé loos no labele nega. Dogma ne’e mak p8edasuk sira fiar nian ne’ebé halo parte ba Kreda tomak. Iha mistériu rua ne’ebé engloba ita-nia fiar no ita reflete iha Tinan Fiar: “mistériu Inkarnasaun no mistériu Redensaun”, D. Basílio hateten. Sé mak sentru iha ita-nia fiar mak ita Na’i Jezús Kristu. Nia mak mai halo an ba ema, terus no mate iha krús hafoin moris hi’as hodi loke ba ita dalan moris nian. Maromak halo an ba ema hodi kasu ita salan no halo ita sai Maromak nia ilas. TInan Fiar konvida ita atu haree ita Na’i Jezús Kristu nia folin iha ita-nia moris. Nu’udar ema, ita haree katak dala barak ita dook husi Maromak, no Papa Bento XVI haree katak mundu ne’e Maromak la iha folin, no ema mak hamriik fali iha Maromak nia fatin mak nia dedika tinan ida atu hakle’an, haboot, moris no sasin fiar sarani. Se ita Hodi la fó folin ba Maromak mak ita mós la fó folin ba ema no ita-nia moris rasik. Tuir D. Basílio “ohin loron iha liurai barak: osan, bosok-teen, kriminozu, elektrónika… Ohin loron ema ne’ebé moris tuir fiar ne’e ema dehan nia ulun la loos. Iha ne’e mak ita tenke barani fó sasin”. “Ema ne’ebé barani fó sasin mak lori Kristu nia krús, sai masin, sai naroman iha situasaun mundu nian nia leet”, nia kontinua.

D. Basílio mós fó sai katak tinan oin Amu-Papa, haree ba dezafiu pastorál sira ne’ebé hasoru iha evanjelizasaun família nian, husu Kreda tomak atu fó atensaun ba família no Kreda sei hala’o Sínodu estraordináriu Bispu sira-nian iha 2014 no Sínodu ordináriu iha 2015 atu trata assuntu ne’e.

Atu taka nia agradese parókia sira hotu no nia pároku sira, sarani hotu baluk ida Kristu nia isin nian iha parte hotu dioseze nian, ne’ebé halibur hamutuk atu renova no haklaken sira nia fiar.