Liturjia Domingu da-20 Tempu Komún nian repete tema domingu ikus sira nian: Maromak hakarak oferese ba ema sira, iha momentu hotu ninia dalan nian iha rai ne’e, “paun” moris nakonu no definitivu nian. Naturalmente, ema sira tenke halo ninia hilin no hakohak don ida-ne’e.

Iha Evanjellu, Jezús afirma filafali objetivu finál ninia misaun nian atu fó “paun moris” nian ba ema sira. Atu simu moris ne’e, eskolante sira hetan konvite atu han Jezús nia “isin” no hemu Jezús nia “raan” – katak, adere ba ninia an, asimila ninia projetu, interioriza ninia proposta. Eukaristia sarani (“han” no “hemu”  Jezús nia isin no raan) maka momentu priviléjiu nian ba enkontru ho moris ne’ebé Jezús mai atu oferese mai ita.

Leitura dahuluk oferese mai ita ai-kanoik ida kona-ba festa han-hemu nian ne’ebé “señora sabedouria” prepara ba “ema simples” sira no ba sira ne’ebé hakarak manán neon-laek. Nia konvida atu loke an ba Maromak nia don sira no ba disponibilidade atu hakohak Maromak nia vida (paun Maromak nian tuun husi lalehan).

Leitura daruak fó hanoin sarani sira kona-ba sira-nia opsaun/hilin ba Kristu (ne’ebé Evanjellu ohin nian bolu “Maromak nia paun ne’ebé tun husi lalehan ba mundu nia moris”). Nia konvida sarani sira atu keta dukur, atu hanoin nafatin sira-nia hilin no kompromisu, atu keta husik an namdoras iha dalan fasilidade no komodizmu nian, atu moris ho empeñu no entuziazmu tatuir Kristu nian, atu haka’as as iha sasin ba valór sira ne’ebé sira fiar.

Download