Dili –  Enkontru ba dala rua ho família Internatu  Balide ho  Irmán Evangelina Xavier, nudar Diretora Komunidade nian ho tópiku  “ Aman inan nia papél iha família laran”. Iha enkontru ne’ebé halo iha loron 12 Agostu, ko’alia mós kona-ba Objetivu loke Internato Balide ba menina sira ne’ebé mai husi munisípiu seluk ne’ebé laiha família iha Dili laran. Iha ne’e fó liu importansia ba menina sira ne’ebé mai husi Orfanatu Venilale no Laga ne’ebe hakarak mai  eskola iha Dili ho razaun laiha família iha Dili laran.  Internato Balide ne’e foin mak loke iha tinan 2018 ne’e ho menina hamutuk 17 ona.  Menina barak mak mai husi Orfanato Laga, no balun mós mai husi família seluk ne’ebé la hetan família iha Dili laran.

Atu hatene no koñese família sira di’ak liu tan presiza halo enkontru ida ho família sira, atu nune’e família bele hatene oan sira nia kondisaun iha koléjiu nia laran.

Enkontru ne’e dirije diretamente ho Irmán Evangelina Xavier nudar Diretora uma nian ne’ebe  hatoo liafuan badak ba família hodi foti fila fali Reitor-Mor nia mensajen ba família sira hodi  dehan:

• Família mak fatin eskola dahuluk iha família laran
• Família mak hanorin oinsa valores sira iha uma laran
• Presiza kria domin loos iha família laran, nune’e família labele naksobu

Liafuan balun foti móshusi Amo Papa Francisco  nia liafuan husi “ GAUDETE ET EXULTATE” ne’ebe sublina liu kona ba santidade laos de’it ba bispu, amu lulik, relijiuzu/a , maibe Nai bolu ita hotu atu sai santu hodi moris ho domin no fó sasin iha buat hotu ne’ebe ita halo.

Família hotu bele sai santu tuir ida-idak nia knar ne’ebe  halao iha família laran.  Tanba husi família mak mosu fini di’ak santidade nian.

Ikus nian ko’alia mós kona ba moris ordináriu internato nian. Liu liu kona ba regulamentu ne’e aplika iha kolejiu laran.  Ho moris ne’ebé hetan iha koléjiu  bele tulun foin-sa’e sira bele deskobre sira nia dalan moris nian hodi deside di’ak ba sira nia futuru.

Iha enkontru ne’e hetan  partisipasaun ativu husi família sira, tanba sira  hotu apresia ho Irmán sira nia akompamentu ba sira nia oan nia kreximentu iha vida espirituál no moris or-loron nian. Iha família balun mós foin mak koñese ambiente Salezianu  no  foin mak rona liafuan sira ne’ebé liga ho Espíritu família Salezianu. Nune’e sira hotu  remata enkontru ne’e ho oin haksolok no agradese.

(Ines Freitas)