Fuiloro – Iha loron 9 Agostu, komunidade Maddalena Morano haksolok, hamutuk ho Irmán no foin-sa’e sira atu simu diretora foun, Ir Ermelinda Gomes. Foin-sa’e sira simu ho bidu tradisionál Lospalos nian hodi hatudu atitude simu nian ne’ebé tama iha ambiente foun.

Irmán Ermelinda Gomes haktuir ninia esperiénisa katak durante ne’e nia nafatin servisu iha área formasaun nian no hela ho labarik ki’ik sira de’it; agora mak foin ba dala uluk hela ho foin-sa’e sira.

Hatán ba pergunta “planu saida de’it mak Ir Ermelinda sei halo atu gia Irmán no foin-sa’e sira iha komunidade Beata Maddalena Morano?”, Ir Ermelinda hatán katak “uluknanai haree hamutuk saida mak sei halo iha futuru”. Importante “kria espíritu família nian entre Irmán sira, foin-sa’e sira no kolaboradór/a sira, kria komunidade ne’ebé iha armonia, serbisu hamutuk hodi haburas liután Maromak nia Reinu ba foin-sa’e sira no ema sira ne’ebé sei hasoru iha misaun ida-ne’e”.

Nu’udar animadora komunidade, Irmán Ermelinda subliña importánsia atu tulun Irmán sira nia kreximentu espirituál no umanu, moris iha fidelidade loron ba loron, dedika an hodi serví, kolabora nu’udar komunidade edukativa ba foin-sa’e sira nia salvasaun.

Ir Ermelinda hatutan katak, “agora ha’u sei haree no koñese lai realidade… halo esperiénsia mak bele hanorin atu la’o hamutuk tuir dalan santidade. Ha’u haksolok ho foin-sa’e sira, sente uma, atu halo misaun hamutuk”.

Provinsiál FMA TIN, Ir Alma Castagna mak akompaña Ir Ermelinda ba ninia komunidade ne’ebé kleur ona hein nia.

(Aida Belita)