Moris iha Paris (Fransa), 2 Agostu 1858. Husi raan liurai, nia mak Prínsipe Ladislau no Prinseza Maria Amparo (Liurai-feto España Maria Cristina nia oan-feto) nia oan-mane, husi ezíliu fransés nia buka hadi’ak unidade ninia pátria polaka, maibé Maromak nia planu ba nia oinseluk tiha. Ho saúde sempre frájil, nia komprende lalais kedas katak nia la moris atu halo moris di’ak liurai sira-nian.

Momentu desizivu iha nia moris mak ninia enkontru ho Don Bosco, iha-ne’ebé nia identifika nu’udar aman nia klamar nian no juiz ba ninia futuru. Iha joven Augusto  vokasaun ba vida relijioza sai klara liután, no Santu edukadór ne’e sai ba nia pontu referénsia ba ninia dixernimentu vokasionál.

Nune’e, husik ninia direitu hotu ba nia alin sira, iha loron 24 Novembru  1887 nia simu ábitu talár iha Bazílika Maria Auxiliadora, husi Don Bosco nia liman, ne’ebé mate liutiha fulan rua.

Hotu tiha estudu teolojia nian, ne’ebé nia kompleta ho difikuldade boot tanba nia saúde fraku no ninia familiár ninia kontrariedade liuliu husi nia aman (nia inan mate bainhira nia tinan neen de’it), Augusto simu  Ordenasaun saserdotál iha 2 Abríl 1892, okaziaun ne’ebé hamosu tátika ida ba rekonsiliasaun familiár.

Augusto enkarna tomak espiritualidade saleziana, ho modu partikulár aspetu sakrifísiu no oferta moris rasik no terus nian ba foin-sa’e sira no ba Kongregasaun nia di’ak: Don Bosco mós terus barak, maski nia la hatudu.  Ninia moris presbiterál dura de’it tinan ida. Defaktu nia mate iha loron 8 Abríl 1893, iha Alassio, depoizde tinan lima vida saleziana, iha-ne’ebé Bispu ida haktuir ho liafuan sira tuirmai ne’e:  “Ninia konformidade perfeita ho vontade divina iha moras laran halo nia eróiku iha pasiénsia ni invensivel iha Maromak nia domin!”.

Ninia restu mortál sira lori ba Polónia no hakoi iha família nia rate, iha kripta parokiál Sieniawa nian, iha-ne’ebé Augusto simu primeira komuñaun no, tuirmai, lori ba igreja saleziana Przemysl nian, iha-ne’ebé sei rai to’o ohin loron. Papa João Paulo II, Papa husi Polónia, haksolok atu beatifika nia iha loron 25 Abríl 2004.