Dili – Loron 5 Agostu 2018,   loron ida ne’e mak nu’udar loron ksolok ba  Irmán  Filhas de Maria Auxiliadora, tanba iha família FMA aumenta tan Irmán nain 5, ne’ebé ohin halo profisaun ba dala uluk, ne’e mak Irmán Abelita Babo, Benedita dos Santos, Cesarina Correia, Lurdes de Carvalho no Virginia da Costa. Selebrasaun  ida ne’e hahú ho Eukaristia santa ne’ebé prezide husi Pe. Provinsiál SDB, Pe. Apolinário Neto, SDB no ko-selebrante  sira hamutuk nain 7. Partisipa iha eukaristia ne’e mak família husi Irmán na’in 5 no Irmán FMA sira hotu.

Iha omilia Padre Apolinário hato’o mensajen kona-ba esperiénsia ksolok domin ba Irmán na’in 5, liu husi sira nia viajem moris, husi família, eskola, uma formasaun  ne’ebé halo sira deskobre Maromak Nia hakarak. La’os husi famillia, belun sira maibé sira rona Jezús nia bolu maka’as tebes, dezafiu oioin ne’ebé sira hasoru atu sira deskobre liu tan kona Jezús Nia bolu! Dezafiu hirak ne’e mak nu’udar sasin ba sira atu deskobre Jezús. Esperiénsia hirak ne’e hotu tanba mós kolaborasaun husi família, tulun sira atu entrega-an tomak atu fó sasin kona-ba reinu lalehan. Jezús bolu sira ho modu espesiál. Iha parte seluk, Padre dezafia sira, katak ohin sira simu kbiit domin foun, esperansa foun iha família boot, Institutu ida, bolun ida ne’e sira hatan ba fidelidade hodi fó reposta pozitiva ba Maromak Nia hakarak. Fidelidade ne’ebé sira halo hanesan dixípulu Jezús nian, sasin ida ne’e sira hatudu mai ita liu husi espíritu Don Bosco no Madre Mazzarello nian, parabéns ba Irmán nain 5 ne’ebé fó resposta kle’an ba ida ne’ebé fihir imi. Jezús mak sentru iha ita ida-idak nia viajem. Hanesan Don Bosco nia liafuan ne’ebé dehan “ família ida ne’ebé entrega oan ba relijiozu, Jezús sei troka nia nafatin” no parabéns mós ba família ne’ebé hatene lee Maromak nia hakarak ba sira.

Ho tempu hanesan Madre Provinsiál mós hato’o ninia mensajen ba Irmán nain 5: “ Ha’u espera katak sira nia “SIM” ne’ebé ohin sira hatan sei ba nafatin, presiza mós Família sira nia orasaun, tanba iha esperiénsia moris loro-loron  dalaruma iha dezafiu  no difikuldade nune’e iha momentu sira ne’e mak presiza imi-nia orasaun atu nune’e sira nia abut sai metin liu tan”.

Ikus liu Irmán na’in 5 mós simu sira nia obediénsia dahuluk: Irmán Benedita ba komunidade Saun João Bosco, Balide, Irmán Lurdes ba komunidade Eusebia Palomino, Irmán Virgínia iha uma Novisiadu ajuda iha Bakery, Irmán Abelita ba komunidade Madre Mazzarello Venilale, Irmán Cesarina ba komunidade Maria Auxiliadora Venilale.

(Ines Bartolo Freitas)