Baucau – Ohin madre provinsiál Timor no Indonesia nian, me. Alma Castagna hotu nia vizita kanónika iha ami komunidade Santa Teresa d’Avila, Baucau. Nu’udar oan sira ami haksolok tebes ba madre nia prezensa nu’udar inan no bin liuliu ninia simplisidade hodi la’o hamutuk ho ami husi loron 23-27. Tuir itineráriu iha dia 24 lokraik madre provinsiál enkontru ho ADMA sira ho tema kona-ba ESTREIA RETÓR-MOR nian kona-ba dixernimentu loos nian ne’ebé bazeia ba rona, dixernimentu no akompañamentu. Nune’e mós konferénsia sira ba komunidade nian madre subliña liu kona-ba dixernimentu ne’ebé bazeia ba Estreia Reitór-Mor nian no Gaudete et Exultate n.66-67, maibé madre husu ba Irmán ida-ida atu hakle’an dokumentu ne’e.

Bazeia ba dokumentu sira ne’e, buat ne’ebé madre provinsiál prezenta no hakarak husi nia Irmán sira ida-ida mak atu kultiva atitude rona nian, atu rona ema presiza hamamuk ita-nia an kansela ita-nia prejudisiu sira atu bele rona ema ho atensaun, ida ne’ebé rona presiza rona ho nia ser tomak.

Iha dia 25 kalan, wainhita hotu tiha vésperas, komunidade iha mós sharing ho madre provinsiál, bazeia ba lectio divina husi Apostólu sira-nia hahalok 8,26-40 kona-ba Apostolu Filipe nia figura ne’ebe S. Lukas aprezenta nu’udar modelu evanjelizasaun nian, Evanjelizadór fiél nian ne’ebé mak Maromak rasik mak gia nia iha Espiritu Santu. Filipe nia hahalok iha evanjelizasaun efikaz mak Filipe sa’e kareta hamutuk ho ema Etiopia nian, katak akompanãmentu efikáz mak atu koñese no tur iha sira-nia sorin atu rona, dixerne no akompaña. No moris nu’udar Kreda katak moris iha resiprosidade husik ema seluk sae iha ita-nia kareta no prontu atu sa’e iha ema seluk nia kareta. Bazeia ba ida ne’e, iha pergunta ne’ebé madre fó ba komunidade atu fahe mak: Hodi kompara ho moris no misaun iha ó-nia komunidade, saida mak komunidade hala’o ona no sa de’it presiza atu hametin liután? Iha sharing ema ida-idak espresa tuir ninia reflesaun, depois hakerek ninia empeñu pesoál hodi rai ba nia an atu reflete ba nia moris.

Iha tinan ida ne’e, joven no labarik sira la marka prezensa iha vizita kanónika ne’e tanba tempu ezame nian monu kedas iha dia 23 iha loron hanesan madre provinsiál mai vizita iha mai-nia komunidade. Iha dia 25, lokraik komunidade agradese madre provinsiál liuhusi Santa Eukaristia, selebra husi Pe. João da Costa, SDB, hafoin iha kalan atu konklude ninia vizita ne’e madre provinsiál hato’o ninia relasaun kona-ba vizita kanónika ne’e ba komunidade, depois tuir mai ho fraternizasaun hafoin ho fuan gratidaun nian, maski ami na’in neen de’it maibé ami agradese madre Alma ho knananuk simples ida, ho titolu: Lui sta bussando al tuo coure.

Ohin loron 27 fulan Jullu 2018, dadersan de’it madre provinsiál fila fali ba Dili, uma inspetoriál, iha ne’ebé nia sei prepara an atu simu Irmán sira husi komunidade oioin ne’ebé sei halo retiru anuál husi 28 Jullu too dia 05 agostu.

Tebes, ami agradese ba madre Alma ba ninia dedikasaun tomak, ne’ebé rona ami irma sira ida-ida, gia no orienta ami oinsá bele sai fiél ba ami-nia vokasaun no misaun saleziana. No orienta ami oinsá bele organiza pastorál ida efikáz. Liuliu hanorin no hatudu oinsá atu halo dixernimentu ida loos nian atu bele akompaña joven sira iha tempu ohin loron nian, no mós husu komunidade atu halo dixernimentu ida justu atu bele moris hamutuk nu’udar bin alin iha ami-nia moris hamutuk. Agradese ba madre nia domin no ninia liafuan sira haroman no hariku ami no liuliu dudu ami atu ba oin ho otimizmu salezianu.

Obrigada madre ba dedikasaun tomak.

(Lucia Pereira)