Irmán, leigu no foin-sa’e doben sira,

Tatoli ida ne’e publika depois de akontesimentu foun ida ba ita-nia Inspetoria: Maromak bolu ita-nia irmán ida atu halo parte ba Ninia Reinu. Ita hotu la hein akontesimentu ida ne’e, liuliu lalais nune’e, maibé Maromak iha Ninia planu sira ne’ebé ita  susar atu komprende no simu kedas.

Ho oportunidade ida ne’e, uluk nanain ha’u hakarak agradese ema hotu ne’ebé hatudu ninia domin no hato’o ninia kondolénsia ba ami: imi-nia prezensa, imi-nia orasaun fó konsolasaun ba ami no ba Ir. Floriana nia família. Obrigada wain mós ba sira hotu ne’ebé ho laran luak no disponibilidade tulun atu prepara fatin, ambiente, nune’e, ema hotu ne’ebé hatene no hadomi Ir. Floriana bele to’o ami-nia uma no fó ninia adeus ba ita-nia Irmán doben.

Tuir ha’u-nia hanoin, akontesimentu ida ne’e lori pensamentu rua ba ita:

1. Ita presiza prontu nafatin ba Maromak nia bolun. Hanesan Evanjellu dehan “imi matan moris neon na’in bá, basa imi la hatene loron wainhira imi nia Na’i sei hiit An mai” (Mt 24,42). La iha otas, la iha kondisaun sosiál, maibé liuliu la iha posibilidade atu determina bainhira ita-nia Maromak sei hiit An mai, nune’e ita presiza hanoin, hanesan ema matenek ida dehan: “Bainhira ha’u hader dadersan, ha’u husu ba ha’u-nia an: ‘Se ohin ha’u-nia loron ikus, oinsá ha’u sei hala’o ha’u-nia atividade hotu?’; buat ne’e halo ha’u moris ho plenitude”. Salmista, iha salmu 90 (89), konxiente katak ita, nu’udar ema, dala ruma ta’uk atu hanoin ba ita-nia mate,  konvida ita atu husu ba Ida ne’ebé moris nia Na’i: “hanorin ami sura  ami-nia loron sira bá, atu ami bele to’o iha matenek nia fuan” (sl 90,12). Furak liu fraze ida ne’e: “sura ami-nia loron sira”, sura atu rekoñese Maromak nia prezensa no Ninia grasa ne’ebé akompaña ita, maski tempu terus, moras, susar
2. No tanba moris ida ne’e (loron ida-idak nian) mak prezente ne’ebé Maromak haraik mai ita, ita la bele moris lahó esperansa, lahó ksolok, lahó domin. Atitude agradesimentu nian mak karakterístika forte iha ambiente salesianu: don Bosco gosta katak foin-sa’e sira halo festa ba nia bainhira selebra S. João Baptista, la’ós tanba nia hakarak gava an (hanesan ema ruma, ho hanoin aat, dehan kona-ba nia), maibé nia hatene katak atitude ida ne’e bele hetan de’it iha ema ne’ebé tasak no la tau ninia an rasik iha sentru buat hotu nian. Moris ho gratidaun hakonu ita-nia loron sira ho ksolok ho laran metin ba Maromak nia Providensia. Chiara Luce Badano, foin-sa’e feto ida ne’ebé mate tan kankru iha tinan 1990 ho otas 18 no iha tinan 2010 Amu-Papa Bento XVI foti nu’udar Beata, repete fraze ida ne’ebé bele tulun ita hotu atu hasoru ita-nia moris: “Jezús, se Ita hakarak, ha’u mós hakarak”. Foin-sa’e barak fó sira-nia sasin kona-ba ksolok moris nian, maski moras ka terus. Iha momentu ida ne’e, ne’ebé ita prepara ba Sinodu, furak tebes deskobre oinsá Espíritu Santu servisu iha foin-sa’e sira nia laran, bainhira sira la ta’uk atu loke an ba Nia. Nune’e, sira-nia sasin sai dezafiu ba ita hotu atu moris ho ksolok no domin minutu ida-idak ita-nia moris nian.

Ita agradese Na’i ne’ebé haraik Ir. Floriana ba ita-nia Institutu no ba Família Saleziana tomak: buat di’ak ne’ebé nia halo sai konvite mai ita atu la husik fini ne’ebé nia kari, monu iha dalan, maibé bele monu iha ita-nia laran, nu’udar rai bokur ida, eh fó fuan barak.

Obrigada dala ida tan ba imi hotu

Ir. Alma