Liturjia Domingu da-16 Tempu Komún nian konta mai ita Maromak nia domin no atensaun lais ba “bibi sira bibi-atan laek”. Domin no atensaun lais ida-ne’e haktuir nu’udar oferta moris foun no nakonu ne’ebé Maromak halo ba ema hotu.

Iha leitura dahuluk, liuhusi profeta Jeremias nia lian, Jahwéh kondena bibi-atan aat sira ne’ebé uza “bibi sira” atu satisfás sira-nia projetu pesoál; no, ho modu paralelu, Maromak fó sai katak, Nia rasik maka sei tau matan ba ninia “bibi-luhan”, hodi asegura fekundiade ihano vida nakonu, pás, hakmatek no salvasaun.

Evanjellu fó hanoin mai ita proposta salvadora no libertadora Maromak nian ba ema sira, Jezús rasik aprezenta no oras ne’e eskolante sira maka kontinua. Jezús nia eskolante sira – hanesan Jezús – sai sasin Maromak nia domin, laran-luak no atensaun ba mane no feto sira ne’ebé la’o lakon no lahó diresaun iha mundu, hanesan “bibi sira bibi-atan laek”. Nune’e sira tenke refere nafatin ba Jezús. Ho frekuénsia, eskolante sira ne’ebé hetan misaun ba mundu tenke hasoru Jezús, dialoga ho Nia, rona Ninia proposta sira, hamutuk ho Nia elabora projetu sira misaun nian, konfronta anúnsiu ne’ebé sira hato’o ho Jezús nia Liafuan.

Iha leitura daruak, Paulo ko’alia ba sarani sira iha sidade Éfezu nian kona-ba Maromak nia atensaun lais ba ninia Povu. Atensaun lais ida-ne’e manifesta liuhusi Kristu ne’ebé fó ba ema hotu, lahó esesaun, posibilidade atu integra an iha Maromak nia família. Halibur an nu’udar Maromak nia família, Jezús nia eskolante sira sai maun-alin entre sira, kesi hamutuk iha domin ida de’it. Buat hotu ne’ebé sai barreira, divizaun, inimizade, manán tiha ona ho modu definitivu.

Download