Maun no biin-alin sira, bondia!

Evanjellu ohin nian (kf Mc 6,7-13) haktuir momentu iha-ne’ebé Jezús haruka sira na’in Sanulu-Resin-Rua ba misaun. Depoizde bolu sira ida-idak ho naran, «atu horik ho Nia» (Mc 3,14) rona nia liafuan sira no observa ninia jestu sira kura nian, oras-ne’e nia konvoka hikas sira atu «haruka sira na’in rua-rua» (6,7) iha knua sira ne’ebé Nia atu bá. Ne’e mak tipu ida “estájiu” nian ba sira ne’ebé simu bolun atu halo depoizde Na’i nia Moris-Hi’as hodi Espíritu Santu nia kbiit.

Pasajen evanjélika ne’e para iha estilu misionáriu, ne’ebé ita bele sintetiza iha pontu rua: misaun iha sentru ida, misaun iha oin ida.

Dixípulu misionáriu uluknanai iha ninia sentru ida referénsia nian, katak Jezús. Narrasaun indika ida-ne’e hodi uza verbu ruma ne’ebé iha Nia nu’udar sujeitu – «bolu ba nia», «haruka sira», «fó kbiit ba sira», «ordena sira», «dehan ba sira» (vv. 7.8.10) –, nune’e na’in Sanulu-Resin-Rua nia  bá no obra mosu nu’udar naksira husi sentru ida, propoin hikas Jezús nia prezensa no obra iha sira-nia asaun misionária. Ida-ne’e manifesta oinsá Apóstolu sira la iha buat ida sira-nia rasik atu haklaken, la iha mós kapasidade rasik atu hatudu, maibé ko’alia noa tua nu’udar “enviadu sira”, nu’udar Jezús nia mensajeiru sira.

Epizódiu evanjéliku ida-ne’e kona-ba mós ita, no la’ós de’it amlulik sira, maibé batizadu sira hotu, simu bolun atu fó sasin, iha ambiente oioin, Kristu nia Evanjellu. No mai ita mós misaun ida-ne’e auténtika se hahú husi sentur troka-laek de’it, katak Jezús. La’ós sarani ida-idak nia inisiativa nune’e mós la’ós grupu sir anian ka la’ós mós agregasaun boboot sira nian, maibé Kreda rasik nia misaun ne’ebé labele haketak husi ninia Na’i. Laiha sarani ida haklaken Evanjellu “in proprio”, maibé Kreda ne’ebé simu mandatu husi Kristu rasik mak haruka. Batizmu duni mak halo ita sai misionáriu. Batizadu ida ne’ebé la sente nesesidade atu haklaken Evanjellu, haklaken Jezús, la’ós sarani di’ak ida.

Karakterístika daruak estilu misionáriu nian mak, ita dehan oin ida, ne’ebé konsiste iha pobreza meiu sira-nian. Ninia ekipamentu hatán ba kritériu sobriedade nian. Sira na’in Sanulu-Resin-Rua, simu atu «la lori iha viajen buat ida maibé ai-tonka de’it: la lori paun, bolsu, osan iha knotak» (v. 8). Mestre hakarak sira livre no kmaan, lahó apoiu no lahó favór sira, seguru de’it ho Ida ne’eb’e haruka ninia domin, forte de’it hodu liafuan ne’ebé sira atu haklaken. Ai-tonka no sandálias mak ekipamentu pergrinu sira-nian, tanba sira mak mensajeiru Maromak nia reinu nian, la’ós manager kbiit-na’in, la’ós funsionáriu ne’ebé labele book, la’ós estrela sira iha tournée. Ita hanoin porezemplu, ba dioseze ida-ne’e iha-ne’ebé ha’u mak Bispu. Ita hanoin ba santu ruma Dioseze Roma nian: S. Filippo Neri, S. Benedetto Giuseppe Labre, Santu Alessio, Santa Ludovica Albertini, Santa Francesca Romana, S. Gaspare Del Bufalo no seluk barak tan. Sira la’ós funsionáriu ka emprezáriu, maibé sserbvisu-na’in haraik-an Reinu nian. Sira iha oin ida-ne’e. No ba “oin” ida ne’e pertense mís modu oinsá simu mensajen: defaktu bele akontese katak atu ema la simu eh rona sira (kf v. 11). Ida-ne’e mós pobreza: esperiénsia fallansu nian. Jezús nia esperiénsia ne’ebé ema rejeita no hedi iha krús, hatudu sai ninia mensajeiru nia destinu. No hodi ta sai ida de’it ho Nia, mate no moris hi’as mak ita konsege hetan aten-barani evanjelizasaun nian.

Virjen Maria, dixípula dahuluk no misionária Maromak nia Liafuan nian, tulun ita atu lori iha mundu mensajen Evanjellu nian iha ksolok haraik-an no nabilan, hodi supera rejeisaunm inkomprensaun ka terus hotu.