Venilale – Oratorianu sira husi Fatulia, Bado-Ho’o, Sentru Venilale menus Veneduco, ohin halibur hamutuk iha komunidade Made Mazzarello atu hasoru Ir Alma Castagna. Depoizde fó benvinda husi oratoriana ida akompaña ho nia kolega na’in rua ne’ebé tara tais, sira aprezenta knanauk ida hamutuk no dansa rua husi Fatulia no husi Sentru Venilale.

Madre Alma fó apresiasaun ba sira ne’ebé kanata no dansa ho lian tolu: inglés, español no indonéziu. Ir Alma husu ba sira sé mak hanorin atu kanta no dansa? No sira hatán katak madre, maun no biin sira mak hanorin. Maun no biin sira-ne’e uluk oratorianu no agora sai animadór, ne’e dehan katak sira gosta oratóriu, oratóriu tulun sira sai boot. Husi ne’e Madre Alma subliña katak oratóriu ajuda atu hetan ksolok. Nune’e nia dehan ba sira atu kontinua mai oratóriu maibé sai mós misionáriu ba kolega sira hodi bolu mós sira seluk atu mai oratóriu.  Nia dehan ba sira: “se iha imi-nia klasse laran iha ema na’in haatnulu no imi ida-idak konvida kolega ida oratóriu sei sai nakonu”. Ne’e mak dehan sai misionáriu/a:  “aprende haklaken Maromak nia Liafuan, haklaken Evanjellu, sai labarik di’ak ne’ebé sai  belun ho hotu, fó ksolok ba maluk sira”.

Atu remata nia liafuan Madre Provinsiál fó empeñu ba sira atu tinan ne’ebé mai, bainhira nnia mai fali oratorianu sira nakonu didi’ak iha-ne’e.

Enkontru remata ho paun Mazzarello no bebida ida ba labarik hotu.