Fuiloro – Grauduante na’in 66 haksolok tebes tanba konsege remata kursu profisionál iha area sekretariadu no kostura. Iha sekretariadu na’in 63 no suku na’in tolu. Marka prezensa iha graduasaun ne’e, Sr. Sekretáriu Estadu SEPFOPE, Diretora INDMO, sra Isabel de Lima no autoridade nasionál no local sira.

 

Selebrasaun graduasaun hahú ho Eukaristia iha festa Beata Maddalena Morano, padroeira Sentru Formasaun ne’e nian.  Eukaristia preside husi padre Jose Vattaparambil SDB no konselebra husi padre Agapito SDB, pároku Lospalos nian no padre Carlos SDB. Iha omilia, padre José hodi refere ba Evanjellu hateten katak iha edukasaun ita presiza sai hanesan uvas-hun ne’ebé hsik atu tesi nia sanak sira atu fó fuan barak. Ne’e mak knar edukadór sira-nian ne’ebé tenki tesi sanak aat.

Padre Jose mós fó hanoin katak ohin selebra festa Maddalena Morano nian, “edukadora FMA ida ne’ebé tuir Don Bosco no Madre Mazzarello nia ain-fatin fó prioridade ba foin-sa’e  sira nia edukasaun”. Fundadór Don Bosco nu’udar joven nia rasik terus no susar, nune’e nia komprende foin-sa’e sira nia susar no buka dalan atu tulun sira. Halo tiha esperimentu ho mane sira  nia hanoin mós feto sira, no nia buka ema atu kolabora ba obra ne’e. N.a hetan Maria Mazzarello ne’ebé hahú ona obra ba menina sira… Maria Mazzarello aseita Don Bosco nia projetu no halo sai ninian no ho Don Bosco nia projetu sai boot. “Ohin madre FMA sira kontinua obra ne’e no fó dignidade ba feto-raan sira”, nia salienta.

Hotu tiha Eukaristia, kontinua ho programa fahe sertifikadu. Sekretáriu Estadu SEPFPE señór Ilídio Ximenes, enkoraja graduante sira atu kontinua haburas sira-nia formasaun profisionál no la kontente de’it ho sertifikadu 1 no 2 ne’ebé sira hetan ona. Nia mós fahe informasaun kona-ba  SEPFOPE ninia projetu sira iha apoiu ba formasaun profisionál  liuliu sira ne’ebé relevante ba komunidade sira, hanesan ezemplu ida, apoiu ba “turizmu komunitáriu”, loke tan sentru aprendizajen lian koreanu no ingles, nst. Sr. Ilídio hateten katak, nasaun sira hanesan Korea husu traballadór 3.500 no Governu presiza prepara tan ema atu haruka, nune’e mós Australia. Nia husu atu sentru formasaun prepara lista graduada sira nian kompletu ho númeru kontaktu atu sira bele kontakta bainhira iha pedidu mão-de-obra nian.

Sra. Isabel de Lima, Diretora INDMO (Instito Nacional do Desenvolvimento de Mão-de-Obra), justifika ninia prezensa katak nia ne’e tanba INDMO mak hodi Governu nia naran halo akreditasaun ba sentru sira formasaun profisionál nian iha sira-nia abilidade/skill, attitude no koñesimentu. Nia  enkoraja menina sira atu sai hanesan sira nia predesesora sira ne’ebé serbisu ona ne’ebé sai nu’udar diamante lakan iha serbisu fatin. Aleinde ne’e, nia fó sai programa revizaun  sentru formasaun nian iha 2014 ba reakreditasaun Governu, iha mós liafua husi Inan-Aman no menina sira.

Irmán Jacinta Gusmão ne’ebé reprezenta Provinsiál FMA nian fó parabéns ba menina sira, konvida sira tama iha asosiasaun Antiga Aluna FMA nian no husu sira atu realize Maromak nia mehi ba sira. Importante nafatin loke matan no tilun atu deskobre oportunidade hotu ne’ebé Maromak fó atu haburas ba beibeik moris rasik no sai ema folin boot ba família, Kreda no sosiedade. NIa mós husu inan-aman sira atu respeita menina sira nia hilin no tulun sira atu ba oin, hodi keta hein lalais “belis” husi sira.

Selebrasaun remata ho almosu konfraternizasaun nian.