Liturjia Domingu XV Tempu Komún nian fó hanoin mai ita katak Maromak atua iha mundu liuhusi mane no feto sira ne’ebé Nia bolu no haruka nu’udar testemuña ninia projetu salvasaun nian. Ema sira ne’ebé nia haruka tenke iha nu’udar prioridade boot fidelidade ba Maromak nia projetu no la’ós ba sira-nia interese rno priviléjiu rasik.

Leitura dahuluk aprezenta mai ita ezemplu profeta Amós nian. Maromak hili, bolu no haruka profeta atu propoin ba ema sira – ho lialoos no koerénsia – Maromak nia mehi no projetu sira ba mundu. Atua ho liberdade totál, profeta la husik nia an atu hetan manipulasaun husi kbiit-na’in sira ka babeur husi ninia interese pesoál sira.

Leitura daruak garante katak Maromak iha projetu moris nakonu nian, loos no totál ba ema ida-idak mane no feto – projetu ida ne’ebé horiuluk kedas iha Maromak nia neon. Projetu ne’e, aprezenta ba ema sira liuhusi Jezús Kristu, ezije husi ita ita ida-idak resposta desidida, totál no lahó evazaun ka halai subar.

Iha Evanjellu, Jezús haruka eskolante sira ba misaun. Misaun ne’e – nu’udar prolongamentu Jezús nia misaun rasik – konsiste iha haklaken Reinu no luta ho objetividade kontra buat hotu ne’ebé halo ema sai atan no hanetik nia atu haksolok. Molok eskolante sira bá, Jezús fó instrusaun ruma kona-ba forma realiza misaun… Nia konvida ho modu espesiál ba kakiak, simplisidade, hamamuk an husi soin materiál sira.

Download