Liturjia domingu ne’e nian hatudu katak Maromak bolu ema nafatin atu sai sasin iha mundu kona-ba ninia projetu salvasaun nian. La interese se ema sira-ne’e fraku no limitadu; Maromak nia kbiit hatudu liuhusi frakeza no frajilidade instrumentu umanu sira-ne’e ne’ebé Maromak hili no haruka.

Leitura dahuluk aprezenta mai ita estratu ida relatu vokasaun Ezequiel nian. Vokasaun profétika iha-ne’ebá aprezenta nu’udar Jahwéh nia inisiativa, ne’ebé bolu ema nia oan ida / “filho de homem” (katak, ema “normál” ida, ho ninia limite no frajilidade sira) atu sai, iha povu nia leet, Maromak nia lian.

Iha leitura daruak, Paulo asegura sarani sira Korintu nian (hodi fó ezemplu pesoál) katak Maromak atua no manifesta ninia kbiit liuhusi instrumentu fraku no limitadu. Iha apóstolu nia asaun, hodi moris iha kondisaun finitude nian, vulnerabilidade nian, frakeza nian – bele hatudu ba mundu no ba ema sira Maromak nia kbiit no vida.

Evanjellu, hodi hatudu oinsá ema sira husi nia rai Nazaré simu Jezús, afirma filafali ideia ida ne’ebé mosu mós iha leitura rua seluk domingu ne’e nian: Maromak manifesta An ba ema iha frakeza no frajilidade. Bainhira ema sira rekuza atu entende realidade ida-ne’e, fasil liu ba sira atu lakon oportunidade atu deskobre Maromak ne’ebé mai hasoru sira  no hakohak dezafiu sira ne’ebé Maromak aprezenta.

Download