Laga – Loron 30 de Juñu mak loron ne’ebé  ita hanoin no selebra aman Don Bosco nia memória, no ami Juniores mós ohin halo enkontru ho Madre Provinsial, Me. Alma iha komunidade Laga. Ami nia enkontru ne’e nia tema mak “PEDAGOJIA AMBIENTE NIAN”.  Ami hahú enkontru tuku 9:00. Hahú introdusaun husi Me. Alma. Ne’ebé  iha parte ne’e  koalia kona ba, ita nia moris ne’e hanesan musika ida ne’ebé ho notas lahanesan maibé kuandu tau hamutuk sai knananuk ida ne’ebé furak, nune’e mós moris komunidade maske ita ida-idak iha karakter ne’ebé lahanesan maibé husi ne’e mak fò furak ba ita nia moris hamutuk iha komunidade. Depois de introdusaun ami ba halo reflesaun mesak iha “LOME” kapítulu 6 no.144-156 no depois ami ba asembleia, no deskute hamutuk kriteiru sira husi lome ne’ebé buras ona iha komunidade no desafiu sira ne’ebé komunidade hasoru no husi ne’e ami fahe ba malu esperiensia sira.

Ikus depois de han meudia ami kontinua  halo serbisu. Iha segunda parte ne’e, ami halo dezeñu  ida kona ba kritériu sira ne’ebé hatudu karakterístika uma salesiana nian. Ami aprezenta no ikus remata no fila fali ba komunidade.

Ba ha’u enkontru ne’e iha valor bo’ot liu no aumenta tan ha’u nia kapasidade atu asimila karisma Salesiana nian liu- liu kona ba dokumentu sira ne’ebé presiza haklean atu bele tama iha misaun. No iha enkontru ida ne’e tulun ha’u atu hatene fó-an liu tan iha misaun no iha komuniade ne’ebé ha’u hela ba. Dala ida tan obrigada barak ba Madre Provinsial ne’ebé fó ona tempu tomak atu fó  formasaun mai ami Na’i fó bensaun ba Madre no ba madre nia knar hotu.

(Domingas Pereira)