Dili – Enkontru animadores zona Dili, hala’o iha Casa Post Novisiado, loron 01-Jullu-2018,  partisipa husi animadores sira husi sentru  zona Dili nian, husi oratorio Salesiano sira nian no mos oratorio FMA sira nian, partisipantes sira hamutuk  50 pessoas, enkontru hahu ho selebrasaun Eukaristia  ne’ebé preside husi Padre Helio, SDB. Hafoin  missa remata kontinua kedas ho formasaun, Padre Helio mak nudar formador. Topiku  ne’ebé aprezenta kona ba “ Dixernimentu Vokasional ”.  Uluknanain  padre hahu ho pergunta ida, saida mak dixernimentu? Dixernimentu mak haree ba realidade didi’ak, tetu no deside molok halo desizaun ruma. Molok  deside presiza ema seluk nia hanoin, ema ne’ebé loos atu nune’e bele hetan desizaun diak.  Ita nia pastoral tenke fo rezultadu, lori ema atu deskobre Maromak nia hakarak. Iha Sinodu kreda hato’o ninia hakarak; atu hasoru, atu akompaña no atu tau matan ba foin-sa’e ida-idak. Pontu importante ne’ebé Maromak fo mai ita mak; moris no liberdade, livre husi;  buat ne’ebé external no livre atu;  kapasidade atu deside saida mak atu halo.

Fiar mak  baze ba dixernimentu Vokasional, finalidade vokasional mak ema ne’e bele dialogo ho Jezús. Parte  seluk dixernimentu lori ema atu rona buat ne’ebé Espiritu Santu dehan mai ita, rona liu husi akontesimentu, liu husi ema ne’ebé bele sai lian Maromak nian ne’ebé lori ba dalan vokasaun nian.

Atu halo dixernimentu diak iha pontus 3 importante :

Evangelii Gaudium, 51 dehan: Rekoñese, interpreta no hili. Dixernimentu vokasional laos buat ruma ne’ebé halo dala ida deit, maibé prosesu naruk to’o mate, wainhira hetan ona o nia vokasaun loloos, presiza nafatin atu purifika ita nia jornada moris nian.

Atu akompaña  diak iha konviksaun 3 ne’ebé presiza hala’o:

• Maromak hala’o Nia asaun iha ema ida-idak liu husi dezeju, sentimentu ne’ebé iha ligasaun ho ideia, imajen no projetu sira.
• Ema nia fuan fraku, tane’e dala barak duvida atu halo desizaun
• Tulun ema atu deside, hakarak ka lakohi ema tenke deside.

Iha Padre nia liafuan ikus hateten katak “pastoral fo fuan wainhira ita lori foin-sa’e sira ba dalan vokasaun liu-liu to’o iha Kristu”.

(Maria Sarmento Guterres)