Dili – Iha 30 Juñu 2018, iha salaun madres Canosiana Bekora, halao enkontru ba Superiores no membru sira ne’ebé hola parte ba komisaun  Conferência dos Superiores Maoires (CSM). Partisipantes sira mak, madre , Padre provinsial sira no irman, bruder,  sira ne’ebé tama mos iha ekipa. Enkontru ida ne’e  hahu  08.30 no remata tuku 01.30 otl. Ajenda ba enkontru  koalia kona ba; Sosializa rezultadu enkontru kona ba dotasaun jerál  orsamentu  governo ba CET, formaliza membru komisaun sira iha CSM-TL, halo programa annual ba tinan 2018, aprezenta programa anual husi komisaun ida-idak, nst.

Uluknanain  hahu introdusaun husi prezidente CSM Ir. Silvino F. Belo ,CMM  ne’ebé  hato’o tiha liafuan benvindo ba partisipantes sira, no aprezenta kedas rezultadu enkontru ne’ebé CSM hala’o hamutuk ho Conferensia Episcopal Timor Leste(CET). Ne’ebé Koalia  kona ba subsidiu/orsamentu ne’ebé simu husi governu.

Alokasaun orsamentu ne’ebé CSM simu, tuir dadus ne’ebé hetan mak orsamentu ne’e aloka  ba jestaun serbisu sekretariadu ( mobiliarios sekretariadu,salarius ba sekretario), programa konferensia CSM ( Retiru hamutuk, enkontru asembleia jeral, kursu interkogregasional). Pontu seluk mak koalia kona ba kongregasaun hirak ne’ebé  tau matan ba obra karidade ( orfanatu), asrama, se karik atu halo proposta mak tenke  hato’o ba komisaun teknika Diosezana presiza iha koñesimentu husi amo Bispu sira, dioseze tolu, Dili, Maliana no Baucau.  Iha mos posibilidade balun kona ba proposta sira ne’e, se karik proposta ho montante boot liu husi $ 20,000,00 haruka direitamente ba CET, se karik menus husi $ 20,000,00 bele haruka ba dioseze ne’ebé refere. Molok ba iha grupo ida-idak, irmaun aprezenta tan pontu ruma ne’ebé importante liu mak hanesan;  dadus atual kongregasaun nian, kongregasaun foun sira wainhira tama iha Timor tenke  halo resjistu iha dioseze, presiza hatama mos directorio kongregasaun nian iha dioseze,  hatama lista formande sira tinan agora no tinan oin,  wainhira iha vizita kanon husi me. Jeral  kongregasaun  nian tenke halo mos vizita ba amo Bispu no  Nunciatura no kongregasaun sira presiza mos tulun iha komisaun dioseze nian liuliu hodi delega membru sira wainhira dioseze husu.

Depois hato’o tiha rezultadu no programa sira, membru ida-idak ba hamutuk iha grupo hodi hari’i estrutura no halo programa ba tinan ida nian, komisaun ne’ebé eziste iha grupo 6 mak hanesan; komisaun formasaun, komisaun Edukasaun, komisaun litúrjika no katekétika, komisaun JPIJ, komisaun Ad Hoc no komisaun Média komunikasaun. Komisaun balun halao tiha ona sira nia serbisu na balun foin mak hahu atu hari’i estrutura  no halo programa,hafoin diskusaun iha grupo depois halo  aprezentasaun iha asembleia. Ikus liu taka ho orasaun no almoço hamutuk.

(Maria Sarmento)