Amu-Papa iha Angelus 10 Novembru 2013

 

Sidade Vaticano – Oinsá loos moris rohan-laek? Ne’e mak pergunta ne’ebé akompañ aita iha liturjia komemorasaun matebian sira-nian ita hotu halo. Pergunta ne’ebé sai maka’as liután liutiha trajédia ne’ebé kona Filippinas. Ba pergunta ne’e mak Amu-Papa hatán iha orasaun mariana Angelus nian ohin meiudia.

“Ema ne’ebé moris-hi’as sei sai hanesan anju sira, no moris iha estadu oinseluk, ne’ebé oras-ne’e ita labele esperimenta no imajina”, Amu-Papa esplika no hatutan: “Maromak nia naran liga ho mane no feto sira nia naran ne’ebé liga ho Nia, no ligasaun ida-ne’e forte liu mate” no ida-ne’e tanba “Nia rasik mak Aliansa, Nia rasik mak Vida no Resurreisaun, tanba ho ninia domin hedi iha krús Nia manán mate. Iha Jezús, Maromak haraik mai ita moris rohan-laek, haraik ba ema hotu, no tanba Nia ema hotu iha esperansa  ba moris ida loos liu fali ida ne’e”.

“Se ita hateke de’it ho matan ema nian, ita dehan katak ema nia dalan bá husi moris ba mate. Jezús troka perspetiva ida-ne’e no afirma katak ita-nia peregrinasaun bá husi mate ba moris: moris nakonu! Nune’e mate iha ita-nia kotuk, la’ós iha ita-nia oin. Iha ita-nia oin iha Maromak ema moris nian, salan no mate ninia lakon definitivu, inísiu tempu foun ida ksolok no roman nian”.

No iha ona rai ne’e ita bele iha ona antisipasaun realidade abanbairua nian tanba kbiit Sakramentu sira-nian no “esperiénsia ne’ebé ita halo kona-ba ninia domin no ninia fidelidade halakan iha ita ahi iha ita-nia fuan no aumenta ita-nia fiar iha resurreisaun”. No Papa Francisco hatutan: “Maromak nia domin rohan-laek no labele troka”.

Hotu tiha orasaun Amu-Papa hanoin no harohan Ave Maria ida ho modu espesiál ba populasaun Filippinas nian no rejiaun ne’ebé sofre supertufaun Hayan-Yolanda no apela ba tulun konkretu. Vítima sira liu ona 10.000 no buat barak mak estraga liuliu iha lokalidade naran Tacloban. Haiyan harahun 70-80% sidade Tacloban nian, kapitál provínsia Leyte nian.