Sidade Vaticano – Sai sarani mak dalan ida libertasaun nian; ukun-fuan sira liberta egoízmu. Ne’e mak reflesaun sira ne’ebé Papa Francisco fahe iha kuarta, 27 Juñu durante ninia katekeze kona-ba Ukun-Fuan Sanulu.

Papa Francisco fó hanoin katak ukun-fuan sira, liufali ukun-fuan, mak Maromak nia Liafuan ba ninia povu atu bele la’o didi’ak, liafuan domin nian husi Aman ida. Amu-Papa dedika ninia katekeze ba fraze bíblika ne’ebé loke Ukun-Fuan Sanulu sira: “Ha’u mak Na’i ó-nia Maromak, ne’ebé halo ó sai husi Ejitu, husi uma atan nian” (Ex, 20,2).

Tuir Amu-Papa, presiza komprende importánsia deklarasaun dahuluk ne’e – “Ha’u mak Na’i ó-nia Maromak” – ne’ebé komporta relasaun ida katak Maromak la’ós estrañu ida.

Vida sarani mak, uluknanai, resposta gratidaun nian ba Aman ne’ebé jenerozu. Iha sentidu ida-ne’e, sarani sira ne’ebé tuir de’it “devér” sira hatudu katak sira la iha esperiénsia pesoál kona-ba Maromak ne’ebé “ita-nian”. “Ha’u tenke halo ida-ne’e, ida-ne’ebá, ida ne’ebá… Devér de’it. Maibé falta buat ruma! Sá loos fundamentu devér ne’e nian? Fundamentu mak Aman Maromak nia domin, ne’ebé fó uluk, depois komanda”, Papa Francisco esplika.

Tau lei molok relasaun sira la tulun iha dalan fiar nian. “Oinsá mak joven ida bele hakarak sai sarani, se ita hahú ho obrigasaun sira, kompromisu sira, koerénsia sira no la’ós libertasaun? Sai sarani mak dalan ida libertasaun nian! Ukun-fuan sira liberta ó-nia egoízmu no liberta ó tanba iha Maromak nia domin ne’ebé lori ó bá oin”.

Pontu seluk ne’ebé Amu-Papa foti iha reflesaun mak gratidaun, trasu karakterístiku fuan ida ne’ebé Espíritu Santu vizita. “Atu obedese Maromak uluknanai presiza hanoin ninia benefísiu sira”, Amu-Papa hateten, hodi destaka nesesidade atu halo memória kona-ba buat furak barak ne’ebé Maromak halo ba ema.

“Maromak la bolu ita ba moris atu horik iha opresaun nia okos, maibé atu sai livre no moris iha gratidaun, hodi obedese ho ksolok ba Nia ne’ebé fó barak mai ita, sura-laek liufali buat ne’ebé ita bele fó ba Nia. Ida-ne’e furak. Rahun-di’ak ba Maromak nafatin ba buat hotu Nia halo ona, halo daudaun no sei halo iha ita!”.