Dili – Diocese DIli halo enkontru iha loron 26 Juñu 2018 iha salaun Parokial Catedral – Vila Verde Dili. Partesipantes sira mak: pároco sira, membru konseilu pastoral parokial, religiosos-religiosas, no reponsavel departementu sira hotu. Husi komunidade FMA Dili nian iha madre provincial Me. Alma, ho Irmán sira: Ir Esmeralda, Ir Evangelina, Ir Veronica no Ir Sebastiana.

Enkontru hahu’u ho orasaun, hafoin liafuan makloke husi  amu bispo Dioceze Dili, don Virgilio do Carmo da Silva, SDB. Hodi aprezenta objetivu sorumutu nian: atu halo avaliasaun, planu foun, no mos formasaun hamutuk nu’udar agentes pastorais. Hodi hatutan dehan: iha sorumutu ne’e tulun atu sukat forza sira no mos admite limiti sira ne’ebe’ nu’udar diocese hasoru. Ho kaer metin ba Biblia nu’udar Be-Matan ba moris fiar sarani nian. Hamutuk  nu’udar dioceze hatan ba perguntas ne’e: “ ita hakarak ba loos ne’ebe?”.

Amo Bispo don Virgilio, aprezenta mos ikipa peskiza ida ne’ebe’ harii no komposta husi leigus sira no amu lulik balun  no madre ida, ne’ebe’ entrega knar atu  hala’o  peskiza kona ba realidade ne’ebe’ sai disafiu boot iha diocesa Dili. Husi peskiza ne’ebe’ sei halo, ninia resultadu sei foti nu’udar plano pastoral foun ba tinan ne’ebe’ sei mai.

Iha parte daruak mak aprezentasaun kona ba Exortação Apostólica”Gaudete et Exultate”, husi pe. Leandro Maria.  Koalia kona ba objetivu husi document ne’e:

• La’ós atu hetan de’it definisaun kona ba santidade
• Renova fali Na’i Nia Bolu atu sai santu-santa

Bolun ba santidade, katak liuhusi dalan oioin. Dalan ida mak familia; liuhusi figura santu-santa sira nia virtudes; liuhusi jestu kiik sira iha moris lorloron nian. Liuhusi aprezentasaun ne’e, sai mos momentu formasaun ida ba partesipantes sira hotu. Hodi remata ho Amu papa Fransisco nia liafuan kona ba Exortação Apostólica”Gaudete et Exultate, “Sai santu mak vokasaun ema hotu nian”.

Momentu reflesaun no halo plano hamutuk kada vigararia: iha vigararia Dili, vigararia Aileu, vigararia Same, vigararia Ermera, vigararia Oecusi.

Enkontru remata ho liafuan husi amu bispo don Virgilio: enkontru remata ona…

• Saida mak ha’u bele  halo hodi fo kontribuisaun ba dioseze nia moris
• Husu sasin moris nian baseia ba Exortação Apostólica”Gaudete et Exultate
• Aprende atu la’o no servizu hamutuk ho plano dioceze nian.

(Sebastiana Soares)