“Liafuan Sanulu” atu moris Aliansa. Ne’e mak tema katekeze Papa Francisco nian iha kuarta 20 Juñu hodi kontinua siklu katekeze hahú iha semana kotuk.

Papa Francisco subliña katak Ukun-Fuan sira la eziste ba an rasik, maibé halo parte relasaun ida ida; nia fó hanoin kona-ba relasaun Aliansa  entre Maromak no ninia Povu. Amu-Papa observa  mós tradisaun judaika hanaran “Dekálogu” ho “liafuan sanulu”, no liafuan sira ne’e iha forma lei nian,  mandamentu sira, ukun-fuan sira.

“Sá loos diferensa entre komandu/orden ida ho liafuan ida? Komandu mak komunikasaun ne’ebé la husu diálogu. Liafuan fali, mak meiu esensiál ida relasaun nian nu’udar diálogu […] mandamentu sira mak Maromak nia liafuan: Maromak komunka an iha Liafuan sanulu sira-ne’e no hein ita-nia resposta”.

Amu-Papa esplika katak ukun-fuan sira mak diálogu ida. Nia observa katak ema hamriik iha kruzamentu ida nia oin: “Maromak impoin mai ha’u  buat sira ka tau matan mai ha’u? Ninia ukun-fuan sira mak lei de’it ka kontein liafuan ida, atu tau matan mai ha’u? Maromak mak patraun eh Aman? Ita mak súbditu ka oan sira? No iha pergunta sira-ne’e nia oin, Amu-Papa enfatiza: “Maromak mak Aman: imi keta haluha ida-ne’e”.

Jezús Kristu mak Aman nia Liafuan, Amu-Papa hatutam, la’ós Aman nia kondenasaun. “Jezús mai atu salva, ho ninia Liafuan, la’ós atu kondena ita”. “Mundu la presiza legalizmu, maibé kuidadu. Presiza sarani sira ho fuan oan sira-nian, imi keta haluha ida-ne’e”, nia remata.