Iha solenidade ne’e, Maromak nia liafuan aprezenta mai ita figura profétika João Baptista nian. Maromak hili nia atu sai profeta molok nia moris, nia maka “Maromak nia prezente” ida ba nia Povu. Hodi subliña João nia importánsia iha istória salvasaun nian, liturjia hatudu mai ita katak nia la’ós “salvasaun”; nia mai de’it atu dirije ema nia hateken ba Kristu no prepara ema sira nia fuan atu simu “salvasaun” ne’ebé atu to’o mai.

Leitura dahuluk aprezenta mai ita figura profétika misterioza ida, ne’ebé Maromak hili husi kedas inan nia knotak, atu sai “roman ba nasaun sira” no lori Liafuan ba ema sira nia fuan no moris. Impresiona tebes sentralidade ne’ebé Maromak asume iha profeta nia vida: misaun profétika hotu suli husi Maromak no hetan apoiu husi Maromak.

Iha leitura daruak, Paulo ko’alia ba judeu sira Antioquia nian kona-ba profeta João. Iha Paulo nia perspetiva, João nia misaun konsiste iha tene ema sira ba mudansa vida no mentalidade nian, nu’udar ain-hakat dahuluk atu simu “Reinu” ne’ebé Jezús mai atu propoin. Paulo hatudu momoos katak João la’ós Mesias libertadór, maibé ida-ne’ebé mai atu prepara ema nia fuan sira atu simu Mesias.

Evanjellu relata João nia moris. Iha Lucas nia perspetiva, akontesimentu sira liga ho nia moris hatudu katak profeta João maka “prezente ida Maromak nian”. Husi tempu ne’ebá, sai klaru ba ema hotu katak Maromak mak iha João nia ezisténsia nia kotuk, no katak ninia misaun maka sinál ida Maromak nian iha ema sira nia leet.

Download