Dili – “Mornese, Casa de todos”, mak tema ba Kampo Mornese hamutuk ho AA FMA nian, ne’ebé hala’o durante  loron  rua, husi 15 – 16 Juñu. Antigas/Antigos alunos sira halibur hamutuk iha gym Eskola Maria Auxiliadora – Comoro. Irmán sira husi Ámbito Família Salesiana mak organiza, katak Ir. Ermelinda da Silva, ir. Brigida e sr. Sebastiana.

Iha lokraik Sesta-feira AA hahu to’o ba registrasaun nian hamutuk 60 Antigas antigos Alunos, hafoin tuir mai fo bemvinda  ba sira.

Momentu ksolok nian ba antigas-antigos atu halibur hamutuk fali, haskolok ho animasaun no halibur hamutuk ho sira nia kolega sira husi uma ne’ebé sira mai, hafoin reza Tersu ho itinerariu Madre Mazzarello hamutuk. No remata loron ho boanoite no orasaun kalan nian.

Iha loron daruak hahu ho selebrasaun Eukaristia iha kapela komunidade, preside husi padre provincial Pe. Apolinario, SDB.  Iha  nia omilia nia fo komentaria badak kona ba primeira leitura iha ne’ebé: “profeta Elias soe nia kappa ba Eliseo. Leitura ne’e la’o hamutuk  ho Kampu Mornese, nu’udar antigas/os-alunas simu  valores barak husi uma FMA sira nia iha Timor, ne’e mak momentu atu transmite fali iha familia no iha sosiedade. Hanesan Kapa ne’ebé profeta Elias soe ba Elizeo, nune’e mos AA  presiza soe no pasa kappa ne’ebé simu ona iha ambiente FMA nian ba ema seluk ne’ebé imi hasoru iha fatin serbisu.

Atividade daruak iha loron nian mak, Konferensia kona ba Madre Mazzarello nia moris iha Mornese husi ir. Veronica Kusnadi. Momentu furak ba antigas antigos atu halibur hamutuk atu rona no hamanas fali sira nia fuan atu koñese liutan no hadomi liutan Madre Mazzarello, ne’ebé sira koñese bainhira sira hela iha koleju, iha oratorio no mos eskola. Defaktu, depoizde de konferenza, iha perguntas barak husi asembleia. No mos iha partilha iha grupo sira, perguntas husi ir. Veronica ne’ebé sadik oituan antigas-antigos alunus sira:

Novidades saida mak AA sira deskobre kona ba Madre Mazzarello liu husi konferensia ne’e? Resposta: AA Koleju M.Mazzarello- venilale Aprende husi MM iha konferensia ne’e:

• Hadomi Jesus liu buat hotu, prontu nafatin, ksolok, pontual , moris iha simplesidade, pasiensia. Nunka deziste maibe korajen nafatin, Konsoladora, lider, Sai mestra no belun ba ema hotu.

Buat ne’ebé aprende husi koléjiu no eskola ETV iha Venilale: alénde siensia ne’ebé ami aprende iha eskola hanesan suku, tein, ospitalidade, komputador, no lingua. Buat ne’ebé  ami aprende husi valor no espiritualidade MM mak:

• Hadomi Jesus no Na’in Feto. Fó valor ba tempu, sai ema independente, responsábel, Sai professional, Haksolok nafatin.

Maibe importante liu mak iha espiritu Salesiano ne’ebé metin no sai ami nia karakter iha ami ida-ida nia-an, exemplu: bele kontribui iha sosiedade liu husi ami ida-idak nia serbisu ho espiritu ne’ebé ami iha no mós bele muda ami nia parseiru sira ho karakter ne’ebé forte no sériu hodi konvense sira ba tuir misa no lee leitura.

Rezumu husi konferensia husi ir. Veronica, iha lokraik antigas antigos alunus sira, halo pergrinajem Mornesino, kada grupo la’o hamutuk ho madre ida, hahu ho husi Mazzarelli, Borgo Alto, Valponasca, Parokia no remata iha Colegio.

Irmá Alma Castagna, provinsiál FMA TIN mós hato’o nia mensajen ba antigas antigos alunus sira:

Doben sira,

Ha’u hakerek ba imi husi Tigaraksa (Tangerang) iha ne’ebé ha’u sei retiru hamutuk ho irmán sira.

Enkontru ne’ebé ohin imi sei hala’o, la’ós de’it enkontru “nostalgia”, iha ne’ebé imi sei haktuir imi-nia istória sira hodi hanoin bainhira imi sei iha eskola  ka oratóriu FMA sira nian. Bele aproveita mós ba hanoin fali tempu sira ne’ebá! Maibé enkontru ida ne’e hakarak hametin edukasaun ne’ebé imi simu husi FMA sira, hodi ba fali ba ninia abut karizmatiku. “Vizita” madre Mazzarello nia fatin sira (maski ho imi-nia imajinasaun de’it, sei tulun imi atu haforsa estilu ida moris nian, ne’ebé imi hakbesik ona uluk.

Ha’u hein katak enkontru ida ne’e sei hametin fali imi-nia relasaun ba malu, maibé mós sei tulun imi atu hametin imi-nia identidade antigas alunas nian hodi agradese Maromak ba buat hotu ne’ebé imi simu iha esperiénsia ida ne’e.

Ami, husi iha ne’e, sei akompaña ho ami-nia orasaun.

Sr. Alma

 

Molok remata inkontru ne’e, antigas-antigos alunos kada grupo kumprimenta irman sira ho sira nia drama, kanta no dansa. Nu’udar sira nia agradesimentu ba FMA sira nia akompañamentu bainhira sira balun hahu kiik no nu’udar estudante  no oratorianos sira.

(Sebastiana Soares)