Maromak preokupa ho drama sira ema nian? Nia iha ne’ebé iha momentu sira terus no difikuldade nian ne’ebé ita enfrenta iha moris? Liturjia Domingu XII nian hateten mai ita katak ema la lakon, mesak, abandonadu ba ninia sorte; maibé Maromak la’o iha nia sorin, tau matan ba nia ho domin aman nian no oferese ba nia iha pasu ida-idak moris no salvasaun.

Leitura dahuluk ko’alia mai ita kona-ba Maromak ida boot no kbiit-na’in, ne’ebé domina natureza no iha planu perfeitu no estável ba mundu. Maski ema tan ninia limitasaun la komprende, nia presiza saran an de’it ba Maromak iha haraik an.

Iha Evanjellu, Marcos propoin mai ita katekeze ida kona-ba dixípulu sira nia dalan misaun nian iha mundu… Marcos garante mai ita katak dixípulu sira nunka mesak atu enfrenta tempestade sira ne’ebé loroloron mosu iha tasi moris nian… Dixípulu sira la presiza ta’uk, tanba Kristu la’o ho sira, tulun sira manán opozisaun forsa sira-nian ne’ebé opoin ba moris no salvasaun.

Leitura daruak garante katak ita-nia Maromak mak Maromak ne’ebé la indiferente. Ho Jezús ne’ebé mai iha mundu atu liberta ita husi egoízmu ne’ebé halo ita sai husi moris-atan no atu propoin mai ita liberdade domin nian.

Download