Venilale –  Foin-sa’e na’in sanulu-resin-ida ne’ebé hakarak deskobre sira-nia vokasaun, ohin, 15 Juñu, dala ida tan, halibur hamutuk atu reza ho Maromak nia Liafuan. Pasajen ne’ebé sira hodi reza, hakle’an no konfronta ho sira-nia moris mak Samuel nia vokasaun (1 Sam 3,1-10).

Ir Jacinta hahú hodi fó introdusaun kona-ba Samuel nia moris. Samuel, tuir etimolojia ebraika ‘Semu’el’ signifika: “Maromak nia naran”, ka “nia naran mak El”. Ita hatene katak nia mak oan ne’ebé nia inan Ana husu ho matan-been no promete atu saran hikas ba Na’i (Kf. 1Sam 1,28).

Iha pasajen ne’e ita haree katak iha tempu ne’ebá ladún rona Maromak nia Liafuan. Amlulik Eli deskansa no matan hahú sai delek no la haree…Momentu krize nian, istória triste, fiar la fó fuan. Amlulik Eli nia família rasik la moris tuir Aliansa ho JHWH. Iha situasaun  ne’e iha labarik ida ne’ebé serví Na’i, sinál esperansa nian, sai boot iha otas no iha grasa.

Pergunta ne’ebé Ir Jacinta fó ba menina sira atu reflete mak husi pasajen Samuel nia moris ne’e nian saida mak kona liu sira? Tanba sá mak Maromak nia Liafuan ladún rona ona? Saida mak tulun atu rona Na’i nia Lian? Iha imi-nia moris iha mediadór/a ruma ne’ebé tulun sira, gia sira, akompaña sira atu rona, dixerne no moris tuir Maromak nia Liafuan?

Husi sira-nia sharing, foin-sa’e sira dehan katak sira apresia tebes Samuel ninia kapasidade atu rona no ninia obediénsia. Maibé sira ida mós dehan katak, Samuel maski hela kleur iha Maromak nia uma ladauk koñese Maromak, la hatene Nia no la komprende katak Nia mak bolu. Nune’e mós ho nia, tanba hela kleur ho madre sira husi ki’ik to’o ohin maibé, sei susar komprende kona-ba Maromak nia lian iha lian sira seluk nia leet. Menina seluk mós dehan katak, difikuldade atu rona Maromak nia lian tanba media sosiál sira nia lian wain no naresin ne’ebé buka dada sira dook husi Maromak nia Liafoun Di’ak.

Husi parte seluk sira, Ir Jacinta Gusmão haree ba ninia esperiénsia dehan katak, presiza iha ema adultu sira ne’ebé sai mediadór/a  ba foin-sa’e sira iha deskoberta kona-ba Maromak nia projetu ba sira. Ba ne’e, adultu presiza sai ema ho paixaun ba Maromak no paixaun ba foin-sa’e sira, la dukur no la kole, ezemplu dahuluk iha fidelidade ba sira-nia vokasaun rasik. Maromak ko’alia mai ita iha foin-sa’e ida-idak nia moris, sira ne’ebé iha ita-nia leet, iha ita-nia liman laran. Ita FMA hasoru Maromak iha joven ida-idak, pessoalmente.