Sidade Vaticano – Iha katekese kuarta 30 Maiu, Papa Francisco reflete kona-ba koneksaun entre sakramentu Krisma no inisiasaun sarani, hodi fó kontinuidade ba siklu katekeze nian kona-ba sakramentu Konfirmasaun ka Krisma.

“Molok simu unsaun espirituál ne’ebé konfirma no reforsa grasa Batizmu nian, krismandu sira simu bolun atu renova promesa ne’ebé sira-nia padriñu no madriña sira halo loron ida”, Amu-Papa esplika, hodi destaka katak iha momentu ne’e krismandu sira rasik mak profesa fiar iha Igreja.

Espíritu Santu atu mai husu atu ita rekolle an iha orasaun, iha momentu bispu lolo liman ba krismandu sira no hus Maromak atu infunde iha sira ninia Espíritu Paráklitu. Ida-ne’e Espíritu ida de’it, rikusoin don hitu nian: sabedoria, intelijénsia, konsellu, fortaleza, siénsia, piedade no hamta’uk Maromak nian.

“Espíritu ida mesak mak distribui don sira ne’ebé hariku Kreda ida mesak: nia mak Autór diversidade nian, maibé tempu hanesan Kriadór unidade nian. Nune’e Espíritu fó rikusoin sira-ne’e hotu ne’ebé lahanesan, maibé tempu hanesan halo armonia, katak unidade rikusoin espirituál sira-ne’e hotu ne’ebé ita sarani sira iha”.

Pontu seluk ne’ebé Santu Padre aborda mak signifikadu óleu/mina – krisma – utiliza iha selebrasaun. Óleu, Amu-Papa esplika, mak substánsia terapéutika no kosmétika ida, ne’ebé tama iha isin ninia tesidu sira, kura kanek sira no perfuma ka hamorin membru sira. Ba kualidade ida-ne’e mak simbolizmu litúrjiku asume nia atu espresa Espíritu Santu nia asaun ne’ebé konsagra no hakonu batizadu sira.

“Hodi simu iha reen-toos sinál krús nian ho óleu ka mina ne’ebé morin, krismandu simu marka espirituál ida ne’ebé labele halakon, ‘karákter’ ne’ebé konfigura ho modu perfeitu liután ba Kristu no haraik ba nia grasa atu habelar entre ema sira ninia “perfume di’ak” [morin di’ak].

Papa Francisco taka katekeze hodi destaka Espíritu Santu nu’udar don ida atu akolle ho gratidaun.. “Ne’e mak don ida atu proteje ho kuidadu, respeita ho dosilidade, hodi husik nia plasma hanesan wani-isin, ho ninia karidade manas, atu reflete Jezús Kristu iha mundu ohin nian”.