Maun no biin-alin siira, bondia!

Ohin, domingu depoizde Pentekostes, ita selebra festa Santíssima Trindade nian. Festa ida atu kontempla no hahí mistériu Maromak Jezús Kristu nian, ne’ebé Ida iha komuñaun Ema na’in tolu nian: Aman, Oan no Espíritu Santu. Atu selebra Maromak-Domin ho maravilla foun nafatin, ne’ebé oferese ho gratuitu ninia moris no husu ita atu habelar iha mundu.

Leitura bíblika sira ohin nian halo ita komprende oinsá Maromak lakohi revela mai ita katak Nia eziste, maibé liuliu katak “Nia ho ita”, besik mai ita, hadomi ita, la’o ho ita, iha interese ba ita-nia istória pesoál no tau matan mai ita ida-idak, hahú husi ida ki’ik liu no presiza liu. Nia ne’ebé «Maromak iha lalehan» maibé mós iha rai» (kf Dt 4,39). Tanba ne’e, ita la fiar iha entidade ida dook, lae! Iha entidade ida indiferente,lae! Maibé, iha kontráriu, iha Domin ne’ebé kria universu no hamosu povu ida, halo An ba isin, mate no moris hi’as mai tia, no nu’udar Espíritu Santu nakfilak buat htu no lori ba plenitude.

Paulo (kf Rm8,14-17), ne’ebé esperimenta transformasaun ida-ne’e iha an rasik Maromak-Domin hala’o iha nia, komunika mai ita katak Maromak hakarak ita bolu nia Aman, liuliu “Papá” – Maromak mak “ita-nia Papá” –, ho konfiansa totál labarik ida-nian ne’ebé abandona an iha ida-ne’ebé fó moris ba nia, iha ninia liman sira. Espíritu Santu – Apóstolu ne’e fó hanoin tan – hodi atua iha ita halo atu redús Kristu ba personajen ida pasadu nian, lae, maibé atu ita sente nia besik, ita-nia kontemporáneu, no ita esperiemnta ksolok sai oan be;ebé Maromak hadomi.. Ikus nian, iha Evanjellu, Na’i moris hi’as promete atu horik ho ita ba nafatin. No tanba ninia prezensa ida-ne’e no forsa husi ninia Espíritu ita bele realiza ho hakmatek misaun ne’ebé Nia entrega mai ita. Sá loos misaun ne’e?  Haklaken no fó sasin ba ema hotu ninia Evanjellu no haluan komuñaun ho Nia no ksolok ne’ebé mai husi ne’e. Maromak, hodi la’o ho ita, hakonu ita ho ksolok no ksolok mak uitoan linguajen dahuluk ema sarani nian.

Nune’e, festa Santíssima Trindade nian halo ita kontempla mistériu Maromak nian ne’ebé kria kontinuamente, so’i no santifika, nafatin ho domin no tanba domiin, no ba kriatura ida-idak ne’ebé simu nia, Nia haraik atu reflete raiu ida ninia beleza nian, bondade nian no lia-loos nian. Nia uluk kedas hili atu la’o ho umanidade no forma povu ida ne’ebé sai ninia bensan ba nasaun no ema hotu, la esklui nein ida. Ema sarani la’ós ema izoladu, hopa parte ba povu ida: povu ida ne’ebé Maromak forma. Labele sai sarani lahó pertensa no komuñaun ida-ne’e. Ita mak povu: Maromak nia povu. Virjen Maria tulun ita kunpri ho ksolok misaun atu fó sasin ba mundu, hamrook ba domin, katak sentidu moris nian mak loloos domin rohan-laek ne’e, domin konkretu husi Aman, Oan no Espíritu Santu.