Dili – Atu komemora festa Maria Auxiliadora, ne’ebé nu’udar patrona na mahein ba Eskola, hahu kedas husi loron 01 fulan Maiu, alunos sira husi klasse ida-ida, husi pre-eskolar to’o IX^o ano (Pre-secundaria), hatudu sira nia domin ba inan Maria Auxiliadora hodi halo prosisaun ba estatua Maria Auxiliadora tama aula ida-ida, hafoin grupo sira ne’ebé simu estatua Na’i-Feto, organiza atu reza tersu durante estatua iha sira nia aula. Aleinde atividade ida ne’e  iha mos kompetisaun koro, ne’ebé fahe ba klasse ida-idak atu aprezenta, atividade ida ne’e seidauk hala’o tanba relasiona ho tempu nune’e sei hala’o iha loron 03 fulan juñu.

Molok  atu tama ba festa boot ida ne’e loron rua antes eskola fo oportunidade ba alunos sira ne’ebé simu ona primeira komuñaun atu halo konfesoens, iha biban ida ne’e  padre salesiano sira mak sai nu’udar konfesor ba aluno sira, Padre João Gaspar SDB, Padre  Elias de Deus no Padre Manuel Fraile. Molok atu hakbesik ba sakramentu rekonsiliasaun irman sira prepara didiak aluno sira hodi halo ezame de konsiensia, buat ne’ebé interesante liu mak labarik sira ne’ebé lahetan oportunidade atu konfesa maske laos estudante Maria Auxiliadora, maibé sira ho hakarak boot tebes atu halo konfesoens.

Iha loron 24 Maiu mak loron importante tebes ba Eskola, nune’e maske tuir orario parokia nian iha missa tuku neen lorokraik, maibé iha eskola mos organiza misa solene ba  estudante sira. Selebrasaun festa ida ne’e partisipa husi aluno IV ano too IX ano. Iha dader tuku 09.00 otl, hahu ho missa ne’ebé selebra husi padre Mario do Rosario, SDB. Buat  ne’ebé interesante mak maske labarik ne’ebé barak naresin iha gym maibé wainhira Padre ninia omilia sira partisipa ativa rona no hatan ba perguntas hotu ne’ebé Padre husu. Liafuan badak husi Padre nia omilia, uluknanain hahu husi leitura dahuluk  livru Genesis ne’ebé koalia kona ba ema dahuluk ne’ebé monu ba sala,  samea ninia bosok lori ema bas ala, samea laiha ibun maibe ema fiar. No iha leitura daruak : “ wainhira too ona nia oras Maromak  haruka Nia –Oan mane moris husi feto ida nia knotak, feto ne’e nu’udar salvadora, halo ita sai Maromak  Nia Oan, iha evanjellu ne’ebé koalia kona ba Maria nia intervensaun iha festa kazamentu, hatudu katak Maria mak feto ida ne’ebé matan moris, hatene haree ema seluk nia presiza, feto tulun nain. Entaun husi leitura tolu Padre fo konklusaun katak, Ita mak Maria Auxiliadora nia oan sira , entaun lalika koalia lia bosok, la bele dun malu, labele sai hanesan samea ne’ebé bosokten, wainhira kolega bosok ita presiza fo hatene, ba professores ou madre tulun malu atu sai diak no koalia lialoos, presiza sai hanesan Auxiliadora ba maluk sira, haree ema seluk nia nesesidade, fo hatene ema seluk atu tulun, sai hanesan Na’I feto ne’ebé halo diak ba ema hotu no laran metin nafatin iha Maromak.

Iha loron  25 Maiu eskola Maria Auxiliadora mos hetan oportunidade  partisipa iha sertame  ne’ebé organiza husi eskola Kristal, ba komemorasaun  festa Maria Auxiliadora no festa fundasaun institutu Kristal, alunos sira ne’ebé partisipa mak husi 3^o ciclo, atividade ida ne’e sei remata iha dia 31 de Maiu, nune’e provisoriomente husi eskola Maria Auxiliadora grupo ida mak sei tama iha final.

(Maria Sarmento Guterres)