Fatumaka – Santuáriu Maria Auxiliadora iha Fatumaka, tinan-tinan sai meta peregrinasaun nian ba Sarani devotu sira ba Inan Virjen ho títulu ida-ne’e, liuliu husi Família Saleziana.

Amu-bispu Virgílio SDB, bispu dioseze Dili nian mós kompromete atu tinan-tinan sai peregrinu ho Família Saleziana. ”Ita-nia devosaun mak halo ita mai iha-ne’e” no hanesan S. Bernardo hateten, “la iha ema ida ne’ebé halai ba Na’i-Feto no fila ho liman mamuk”, Amu-Bispu dehan.

Nune’e mak, iha loron 24 Maiu 2018, sarani sira, labarik, foin-sa’e sira no adultu, hasae agradese ba Maromak no husu ninia protesaun liuhusi Inan Santa Maria Auxiliadora. Iha tinan ne’ebé ita komemora tinan 150 Santuáriu Bazílika Maria Auxiliadora iha Torino, ne’ebé Don Bosco mak harii, halo ita iha Don Bosco nia atitude gratiduan ba Na’i-Feto ne’ebé akompaña ita-nia moris sarani husi inísiu to’o ninia rohan.  Amu-Bispu Virgílio ne’ebé prezide Eukaristia ne’e hamutuk ho amlulik salezianu na’in 14, husu sarani sira atu iha atitude “gratidaun” nian maibé mós atu ita husu Maromak, hamutuk ho Na’i-Feto iha Kaná atu nia “hakonu ita-nia kusi mamuk sira”.

Atitude ne’e ita mós aprende husi Don Bosco iha ninia loron ikus nian. Iha novena mundiál ba Maria Auxiliadora loron ikus, ita rona oinsá Don Bosco ne’ebé remata harii Bazílika Sacro Cuore” iha Roma tan nu’udar obediénsia ba Amu-Papa, loron tuirmai konsagrasaun Bazílika nian realiza iha loron 14 Maiu 1887, bainhira selebra Eukaristia iha Na’i-Feto nia altar, nia sai nakonu ho emosaun no hahú tanis no tanis. Sira ne’ebé akompaña nia preokupadu uitoan no ikusmai ninia sekretáriu, Pe. Miglietta, dehan ba nia: “Don Bosco nusá ne’e? Ita la sente di’ak?” Don Bosco hateten: “Ha’u haree iha ha’u nia oin mehi tinan 9 nian. Ha’u haree ha’u-nia inan no ha’u-nia maun sira diskute kona-ba ha’u-nia mehi”. Iha tempu ne’ebá Na’i-Feto dehan ba nia: “Bainhira to’o nia tempu ó sei komprende”. Emosaun boot ne’ebé Don Bosco sente no misaun ne’ebé nia hala’o iha nia moris tomak hatudu momoos katak Na’i-Feto nafatin akompaña ninia moris, katak Nia mak halo buat hotu no agora nia bele haree katak vale duni atu halo sakrifísiu barak, serbisu barak ba foin-sa’e sira-nia salvasaun.

Iha-ita-nia moris sempre iha Inan ida atu kaer ita-nia liman hodi gia ita. Nia mak Maria!