Venilale – Loron Maria Auxiliadora, 24 Maiu, menina sira ne’ebé hakarak deskobre vokasaun halibur hamutuk atu halo orasuan ho Maromak nia Liafuan. Pasajen Evanjellu ne’ebé sira reflete hodi konfronta ho sira nia moris no fahe, hamutuk ho Ir Jacinta Gusmão mak ida “Foin-sa’e riku” (Mt 19, 16-30).

Molok ne’e Ir Jacinta fó pergunta rua ba sira hanesan tuirmai ne’e: “Difikuldade saida mak joven riku ne’e hetan atu hatán ba Jezús nia bolun?; Se ha’u mak iha foin-sa’e riku ne’e nia fatin ha’u sei hatán oinsá?”

Depoizde leitura no silénsiu ba reflesaun, sira ida-idak fahe. Ba pergunta dahuluk, hotu haree katak difikuldade ne’ebé joven ne’e hetan mak nia la prontu atu fa’an ninia rikusoin hodi fahe ba kiak sira. Ninia kesi an ba rikusoin mundu nian impede nia atu tuir Jezús.

Se karik ó mak joven riku ne’e sira hatán oinsá?

Jenifer: Ha’u mós sei hatán hanesan joven ne’e tanba moris ohin loron nian ne’e la fasil, liuliu ba ita-nia inan-aman sira ne’ebé tenke serbisu maka’as, hikis kosar-been mak foin hetan hahán bikan ida ho osan balun atu sustenta família. Ha’u mós hakarak halo komparasaun ho ami, agora dauduan ne’e, se bainhira madre husu ba ami atu sai madre ha’u sei hatán: ‘saidauk bele kedas, tanba ami tuir lai pasu ba pasu to’o ikus mak deside”.

Elizita: Se ha’u mak iha joven ne’e nia fatin, ha’u seidauk bele hatán tanba ha’u sei iha dúvida nia laran, maibé, neineik-neineik ha’u sei hatán “sim” ba Maromak. Tempu agora ha’u seidauk bele hatán ba Maromak.

Francisca: Ha’u sei buka deskobre no dehan “sim” se Na’i hakarak ha’u tuir nia.

Adencia: Se ha’u mak iha joven ne’e nia fatin, la’ós atu hatán kedas maibé, ha’u sei koko atu hatán bainhira ha’u prontu ona tanba ha’u sei duvida hela.

Domingas: Mai ha’u se Maromak bolu duni ha’u, no tan Ninia promesa sira ba ema ne’ebé tuir Nia, ha’u sei hatán “sim” ba Maromak nia bolun.

Ir Jacinta: Hateke ba kotuk, ha’u haree katak ho Maromak nia grasa, ha’u barani hatán “sim” ba Na’i, bainhira ninia tempu to’o. Tanba ha’u hili sai Irmán saleziana, ne’ebé tempu ne’ebá seidauk iha, ha’u hala’o serbisu iha “Dinas Kesehatan Kabupaten” no iha kargu, osan, posibilidade kontinua estudu. Maibé bainhira ami-nia pedidu atu FMA sira mai Timor realiza duni, ha’u deside rezigna an husi serbisu no hahú dalan formasaun ba FMA. No to’o ohin loron ha’u haksolok ho ha’u nia hilin, tanba buat ne’ebé Jezús promete iha Evanjellu ne’e realiza duni, menus moris roahn-laek tanba seidauk husik mundu ne’e.

Bainhira hotu tiha “sharing”, ami entrega ami-nia dalan ba Maria, Feto ne’ebé sai ami-nia modelu atu deskobre no hatán ba Maromak nia planu mai ami.

Hafoin, menina ida husu tan pergunta rua ba madre Jacinta: “Moris iha komunidade konserteza iha dezafiu ruma. Oinsá madre enfrenta dezafiu sira-ne’e? Iha madre sira-nia moris mós iha tentasaun oioin. Entaun siada mak halo madre iha forsa atu hasoru tentasaun, hodi manán tentasaun sira-ne’e?

Ba pergunta sira-ne’e Ir Jacinta dehan katak dezafiu moris komunidade mak dezafiu relasaun interpesoál, bainhira ita ema lahanesan moris hamutuk dalaruma xoke malu. Problema mós karákter ida-idka nian no maturidade pesoál. Ba salezianu sira Don Bosco fó “espíritu família nian” ne’ebé sai naroman atu leno moris komunitária…. Kona-ba tentasaun sira…ita sai konsagrada maibé ita nafatin ema no tentasaun sira ne’e liga ba profisaun votus ne’ebé ita halo ona atu moris iha komunidade ba misaun ida iha kastidade, pobreza no obediénsia. Hasoru tentasaun sira, ita iha Maromak nia grasa liuhusi orasaun, Ninia Liafuan, sakramentu sira no luta konstante hasoru ita-nia frakeza no diabu nia babeur sira. Moris komunitária mós tulun atu manán tentasaun sira.

Husi meiudia ba oin alunu/a sira ETV nian bá Fatumaka ba selebrasaun solenidade Inan Doben Maria Auxiliadora nian.

(Jenifer Soares – Redasaun)